Sign In 
ដោយសារស្ថានភាព នៃកូវីដ-១៩កំពុងឆ្លងរាលដាល ទើបធ្វើឲ្យប្រទេសនៅលើពិភពលោកបិទព្រំដែនទាំងអស់ ហើយពលរដ្ឋដែលនៅក្រៅប្រទេសជាច្រើន មិនអាចវិលត្រឡប់ទៅស្រុកវិញបានឡើយ។ រដ្ឋាភិបាលវៀតណាម បានសម្រេចបញ្ជូនយន្តហោះពីរគ្រឿង ដឹកពលរដ្ឋអឺរ៉ុបបប្រមាណ៦០០នាក់ ដើម្បីវិលត្រឡប់ទៅប្រទេសកំណើតវិញ។ ការបញ្ជូនពលរដ្ឋទៅកាន់អាល្លឺម៉ង់ មានពីរលើក ក្នុងលើកទី១ នៅថ្ងៃទី៦ និងលើកទី២ នៅថ្ងៃទី៨ ខែមេសា ឆ្នាំ២០២០។
ជើងហោះហើរខាងលើត្រូវបានរដ្ឋាភិបាលអាល្លឺម៉ង់ និងក្រសួងការបរទេសសហការជាមួយក្រុមហ៊ុនអាកាសចរណ៍ Vietnam Airlines ក្នុងការដឹកពលរដ្ឋអាល្លឺម៉ង់ទៅផ្ទះវិញ។ ជើងហោះហើរ នៅថ្ងៃទី៨ ខែមេសា នេះ គឺបានដឹកទាំងគ្រឿងបរិក្ខារពេទ្យ ជាជំនួយរបស់រដ្ឋាភិបាលវៀតណាម ផ្ញើជូនប្រទេសអាល្លឺម៉ង់ បារាំង អ៊ីតាលី អេស្ប៉ាញ និងអង់គ្លេស ដើម្បីទប់ស្កាត់ការឆ្លងរាលដាល នៃវីរុសកូវីដ-១៩។
ជើងហោះហើរពិសេសនេះ ទាំងអ្នកដំណើរ និងពលរដ្ឋ ចាំបាច់ត្រូវតែអនុវត្តបម្រាមទប់ស្កាត់ឆ្លងរាលដាល នៃកូវីដ-១៩ ។ ក្រុមអាកាសយានិកទាំងអស់ ត្រូវតែពាក់អាវការពារឆ្លងកូវីដ-១៩។ ចំណែកអ្នកដំណើរ ក៏ឆ្លងកាត់ការត្រួតពិនិត្យ ដោយធ្វើតេស្ត មុនពេលនឹងឡើងយន្តហោះផងដែរ។
អ្នកដំណើរទាំងអស់ ត្រូវពាក់ម៉ាស់គ្រប់ពេល ក្នុងអំឡុងធ្វើដំណើរតាមយន្តហោះ។ ក្រុមហ៊ុនអាកាសចរណ៍ មិនបានបម្រើសេវាកម្មអាហារ នៅលើយន្តហោះនោះឡើយ ដើម្បីបញ្ចៀសការឆ្លងវីរុស។ ប៉ុន្ដែប្រសិនបើមានការបរិភោគអាហារនោះ គឺត្រូវតែដោះម៉ាស់ទាំងអស់ ហើយវាអាចបង្កឲ្យមានគ្រោះថ្នាក់ ប្រសិនបើមានអ្នកផ្ទុកកូវីដ-១៩ នៅក្នុងយន្ដហោះនោះ៕ ប្រែសម្រួលដោយ៖ MEO
