លោក Vicente del Bosque បាននិយាយថា Neymar គឺជាមនុស្សចូលចិត្ដបន្លំធ្វើពុតជាឈឺ និងបានព្រមានទៅដល់ក្រុម Barcelona ដែលមានគោលបំណងចង់បានរូបគេមកវិញ។

Neymar បានចាកចេញពី Barca កាលពីឆ្នាំ២០១៧ និងបានចូលរួមជាមួយ Paris Saint Germain ក្នុងតម្លៃកំណត់ត្រា ២០០លានផោន ប៉ុន្ដែចាប់តាំងពីពេលនោះ រូបគេតែងតែជាប់ពាក់ព័ន្ធជានិច្ចជាមួយនឹងការអាចវិលមកកាន់ទឹកដី Nou Camp វិញក្នុងថៃ្ងណាមួយ។

យ៉ាងណាក្ដីអតីតគ្រូបង្វឹករបស់ក្រុមជម្រើសជាតិអេស្ប៉ាញ​ លោក Vicente del Bosque បាននិយាយថា Neymar គឺជាកីឡាករដែលមានទេពកោសល្យ ប៉ុន្ដែអត្ដចរិករបស់គេ ជាពិសេសការធើ្វពុតរបស់គេគឺបង្ហាញពីឧទាហរណ៍មិនល្អដល់កីឡាករផ្សេងៗដ៏ទៃទៀត។

«គេជាមនុស្សពិបាក។ សម្រាប់ខ្ញុំមិនមែនជាឧទាហរណ៍ឡើយ។ សម្រាប់កំណត់ត្រាវិញ ចំពោះខ្ញុំ រូបគេជាកីឡាករអស្ចារ្យ» អតីតគ្រូបង្វឹក Real Madrid និយាយប្រាប់កាសែត Mundo Deportivo។

«បើអ្នកសួរខ្ញុំពីកីឡាករទាំង៥ ល្អជាងគេលើលោក ខ្ញុំអាចនិយាយបានថា Neymar គឺស្ថិតក្នុងបញ្ជីនោះ។ ប៉ុន្ដែនៅលើទីលាន គេតែងតែព្យាយាមធើ្វពុត និងបន្លំច្រើនណាស់»៕

ប្រភព៖ Dailymail

from： https://tnaot.com/km/m/detail/article/9110414