មេភូមិម្នាក់បានបាញ់សម្លាប់ព្រះសង្ឃមួយអង្គ ដែលល្បីល្បាញខាងអភិវឌ្ឍន៍ និងពលរដ្ឋម្នាក់ ពីការបំពាននូវបម្រាមគោចរ នាពេលយប់ ហើយអ្នកប្រព្រឹត្ដអំពើឃាតកម្មនោះ ក៏ត្រូវបានចាប់ខ្លួនផងដែរ។

បណ្ដាញផ្សព្វផ្សាយរបស់ថៃ បានផ្សាយ កាលពីថ្ងៃទី៧ ខែមេសា ឆ្នាំ២០២០ ថា ហេតុការណ៍បាញ់សម្លាប់មនុស្ស២នាក់នេះ បានកើតឡើង នៅតាមជិតវត្ដ Khao Phela តាមផ្លូវ Khao Phela ស្ថិតក្នុងឃុំ Tambon Samor Thong  ស្រុក Tha Chana ។

លោក Wisut Intharakamnoen អភិបាលស្រុក Tha Chana បានថ្លែងថា ករណីនេះមានគេរាយការណ៍មកលោក កាលពីវេលាម៉ោង២រំលងអធ្រាត្រ ថ្ងៃទី៧ ខែមេសា ។ លោកក៏បានទៅជាមួយនឹងលោកវរសេនីយ៍ Thitiwat Suthitivanich អធិការនគរបាលស្រុក និងប៉ូលិសដទៃទៀត ដើម្បីពិនិត្យមើលនៅកន្លែងកើតហេតុ។

លោកអភិបាលស្រុក បានបន្ដថា នៅពេលចុះមកដល់ឃើញបុរសម្នាក់ ឈ្មោះ​ Churat Khongkhlai អាយុ៤៨ឆ្នាំ ស្លាប់នៅលើយានយន្ដ ដោយមានស្នាមរបួសនៅលើខ្លួន។ ចម្ងាយពីសពនោះ ប្រហែល១០ម៉ែត្រ ក៏ឃើញសាកសពព្រះសង្ឃមួយអង្គ ត្រូវគេស្គាល់ព្រះនាម Phra Chonlathan Thavaro Kanchanabut ព្រះជន្ម៤៩ព្រះវស្សា។ ព្រះអង្គមានតួនាទីជាព្រះចៅអធិការវត្ត Khao Phela ។

លោកអភិបាលស្រុក បានបញ្ជាក់ថា នៅលើសាកសពរបស់ព្រះសង្ឃអង្គនេះ មានឃើញស្នាមរបួសត្រង់ព្រះសិរ (ក្បាល) និងឆ្អឹងជំនីរ។ ក្រៅពីនេះ​ សមត្ថកិច្ចបានរកឃើញកាំភ្លើងខ្លីមួយដើម នៅជិតព្រះសព​។ ដោយឡែកជនសង័្សយ ឈ្មោះ Manop Kopin អាយុ៥៥ឆ្នាំ មេភូមិ Moo 9 ឃុំ Tambon Samor Thong ក៏ត្រូវបានចាប់ខ្លួនផងដែរ។

លោក Panyaporn Wattanapramote ជំនួយការលោកអភិបាលស្រុក បានថ្លែងថា មុនពេលកើតមានអំពើឃាតកម្មនោះ លោកបានទទួលសេចក្ដីរាយការណ៍ពីលោក Thasaphon Thipsak មេឃុំ Tambon Samor Thong ថា មានមនុស្សពីរនាក់ត្រូវបានចាប់ខ្លួន នៅវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី៧ ខែមេសា ពីបទចាកចេញពីផ្ទះ នៅក្នុងអំឡុង​ពេលបម្រាមគោចរ ចាប់ពីម៉ោង១០យប់ រហូតដល់ម៉ោង៤ព្រឹកទៀបភ្លឺ។

លោកជំនួយការ បានបន្ដថា ក្រោយមានសេចក្ដីរាយការណ៍បែបនេះ លោកបានដឹកនាំក្រុមការងារទៅកាន់ទីនោះ ឃើញលោក  Manop ​មេភូមិ និងក្រុមការងាររបស់គាត់ បានឃាត់ខ្លួន ឈ្មោះ Churat និង ព្រះសង្ឃ ព្រះនាម Phra Chonlathan។ រីឯយានយន្ដ និងសម្ភារផ្សេងៗ ក៏ត្រូវបានរឹបអូស។

លោកជំនួយការ បានបន្ដថា ខណៈលោកកំពុងធ្វើសេចក្ដីរាយការណ៍តាមទូរស័ព្ទ អំពីការរំលោភបំពានបម្រាមគោចរទៅជូនលោកអភិបាលស្រុក ស្រាប់តែលោកបានឮស្នូរកាំភ្លើងផ្ទុះឡើង។ ភ្លាមៗនោះ លោក​បាន​ទៅពិនិត្យមើលឃើញមេភូមិបាញ់សម្លាប់ព្រះសង្ឃមួយអង្គ និងពលរដ្ឋម្នាក់។

ដោយឡែក ជនសង័្សយឈ្មោះ Manop បានអះអាងប្រាប់ប៉ូលិស ក្នុងអំឡុងពេលសួរចម្លើយថា គាត់ឃើញព្រះសង្ឃអង្គនោះ ដកកាំភ្លើងខ្លី និងពលរដ្ឋឈ្មោះ Churat ដកកាំបិតចុងស្រួច។ ឃើញបែបនេះ គាត់មាន​អារម្មណ៍ភិតភ័យយ៉ាងខ្លាំង ហើយជឿថា ពួកគេនឹងចាក់គាត់ ទើបគាត់បាញ់រះចំនួន៣គ្រាប់សំដៅទៅលើព្រះសង្ឃ និងបុរសម្នាក់នោះតែម្ដង។

ប៉ូលិសថៃ បានបញ្ជាក់ថា ក្រោយពេលកើតហេតុ ប៉ូលិសបានចាប់មេភូមិ​ នាំទៅឃុំឃាំង ដើម្បីស៊ើបអង្កេតលើករណីនេះបន្ដទៀត។ ក្រៅពីនេះ ប៉ូលិសនឹងបន្ដប្រមូលភស្ដុតាងបន្ថែមជុំវិញករណីឃាតកម្មខាងលើ។

ប្រភពព័ត៌មានផ្សេងទៀត បានឲ្យដឹងថា ព្រះចៅអធិការ Phra Chonlathan មានភាពល្បីល្បាញ ក្នុងការដឹកនាំអ្នកស្រុកអភិវឌ្ឍ នៅក្នុងស្រុក Tha Chana និងកសាងសមិទ្ធផលផ្សេងទៀត មានទាំងការដាំដើមឈើ​ …ជាដើម រហូតទទួលបានរង្វាន់ Hemmarat ផងដែរ៕ ប្រែសម្រួលដោយ Nuon

from： https://tnaot.com/km/m/detail/article/9108779