ក្លិបសេះបង្កង់ Juventus ត្រូវបានរាយការណ៍ថា កំពុងត្រៀមដាក់លក់ខ្សែបម្រើកណ្តាល Miralem Pjanic នៅក្នុងកំឡុងទីផ្សារដោះដូរកីឡាកររដូវក្តៅនេះ។

យោងតាមកាសែតអ៊ីតាលី Calciomercato បានឱ្យដឹងថាក្លិបសេះបង្កង់នឹងដាក់លក់ខ្សែបម្រើសញ្ជាតិបូស្នៀខាងលើក្នុងតម្លៃ ៥០លានអឺរ៉ូ ប្រសិនបើក្លិបណាចង់បាននៅរដូវក្តៅនេះ។

Pjanic បានចាប់ផ្តើមរដូវកាលថ្មីមិនសូវបានល្អសោះ ក្រោមការដឹកនាំរបស់លោក Maurizio Sarri នៅរដូវកាលនេះ។ អ្នកចាត់ការក្លិបរូបនេះ កំពុងតែពេញចិត្តនឹងទម្រង់លេងរបស់ខ្សែបម្រើ Bentancur ដោយលោកតែងតែផ្តល់ឱកាសលេងជាកីឡាករជម្រើសដំបូងសម្រាប់រូបគេ ហើយ Pjanic ស្ថិតក្នុងកៅអីបម្រុងមួយរយៈចុងក្រោយនេះ។

យ៉ាងណាមិញ លោក Sarri កំពុងតែបើកភ្លើងខៀវសម្រាប់ខ្សែបម្រើសញ្ជាតិបូស្នៀរូបនេះក្នុងការស្វែងរកទ្រនំថ្មី ក្រោយក្លិបគ្រោងនឹងនាំយកខ្សែបម្រើសញ្ជាតិបារាំង Paul Pogba ត្រឡប់មកទឹកដី Turin  វិញ។

សម្រាប់រដូវកាលនេះ Pjanic រកបាន ៣គ្រាប់ ប៉ុណ្ណោះ ក្នុងការបង្ហាញខ្លួន ២២ប្រកួត កន្លងទៅ ខណៈកុងត្រាជាមួយក្លិបនឹងត្រូវអស់សុពលភាពនៅឆ្នាំក្រោយ។

គួររំលឹកដែរថា Pjanic ត្រូវបានក្លិប Juventus ទិញមកពី AS Roma កាលពីឆ្នាំ២០១៦ ជាមួយតម្លៃផ្ទេរ ៣២លានអឺរ៉ូ ក្នុងកិច្ចសន្យារយៈពេល ៥ឆ្នាំ៕

កែសម្រួលដោយ៖ ភារ៉ា

ប្រភព៖ Calciomercato

from： https://tnaot.com/km/m/detail/article/9107985