Sign In 
សៀមរាប៖ រដ្ឋាភិបាលស្រុកបន្ទាយស្រី នៃខេត្តសៀមរាប ទទួលបានរថយន្តដឹកសំរាមខ្នាតតូចចំនួន ៦គ្រឿង ពីក្រសួងបរិស្ថាន ដើម្បីអនុវត្តន៍គម្រោងបន្ទាយស្រីស្អាតឆ្នាំ២០២០ របស់អភិបាលវ័យក្មេងលោក ឃឹម ហ្វីណង់។ 
លោកអភិបាលស្រុកបន្ទាយស្រី បានបញ្ជាក់ថា រថយន្តដឹកសំរាមខ្នាតតូចទាំង៦នេះ នឹងចេញទៅដឹកសំរាមនៅតាមបណ្តាឃុំទាំង៦ របស់ស្រុកបន្ទាយស្រី មកដាក់កន្លែងរួមមួយ ដើម្បីងាយស្រួលឱ្យរថយន្តធំដឹកបន្តទៅកាន់ឡដុតសំរាមតែម្តង។ ក្នុងនាមជាស្រុកតំបន់ទេសចរណ៍មួយរបស់ខេត្តសៀមរាប គឺពិតជាមានការចាំបាច់ណាស់ ត្រូវមានយន្តការមួយជាក់លាក់ក្នុងការគ្រប់គ្រងសំរាម ដែលរហូតមកដល់បច្ចុប្បន្ននេះ សំរាមនៅក្នុងស្រុកបន្ទាយស្រី នៅតែមានការរាយប៉ាយនៅតាមទីសាធារណៈនៅឡើយ។ 
លោកបន្ថែមទៀតថា ជាមួយគ្នានេះ នៅពេលអាជ្ញាធរធ្វើការគ្រប់គ្រងសំរាមបានល្អហើយនោះ អាជ្ញាធរនឹងចាប់ផ្តើមរឹតបន្តឹងការបោះចោលសំរាមពាសវាលពាសកាលឱ្យបានកាន់តែខ្លាំងបន្ថែមទៀត ក្នុងគោលដៅភូមិនៅបន្ទាយស្រីគ្មានថង់ប្លាស្ទិក។
លោកអភិបាលស្រុកដ៏ឆ្នើមរូបនេះ ក៏បានអះអាងទៀតថា សំរាម គឺជាចំណែកមួយតូចក្នុងយុទ្ធនាការធំបន្ទាយស្រីស្អាតឆ្នាំ២០២០ ហើយដើម្បីឱ្យយុទ្ធនាការនេះ ដំណើរការទៅដោយជោគជ័យ អាជ្ញាធរចាំបាច់ធ្វើការណែនាំអប់រំប្រជាពលរដ្ឋឱ្យមានការយល់ដឹងពីរបៀបនៃការទុកដាក់សំរាម ការញែកសំរាមឱ្យបានត្រឹមត្រូវផងដែរ៕ ដោយ៖ តារា
