ប្រទេសអារ៉ាប់រួម​  (UAE)​ បានផ្តល់ជំនួយបរិក្ខារវេជ្ជសាស្ត្រ​សំខាន់ៗ​ ជាដំណាក់កាល​ដំបូង​​ដល់ប៉ាគីស្ថាន​ កាលពីថ្ងៃទី២ ខែមេសា ឆ្នាំ២០២០ ដើម្បីប្រយុទ្ធប្រឆាំង​ឲ្យកាន់តែមានប្រសិទ្ធភាព​ទៅលើ​វីរុស COVID-19 ខណៈប្រទេស​មួយនេះ​ មានអ្នកឆ្លងជំងឺ ​កើនឡើងជាង​ ២ ៣០០​ នាក់ នៅទូទាំងប្រទេស។ វីរុស​ ​COVID-19 ​នៅប៉ាគីស្ថាន ឆ្លងសរុប ២ ៣៨៦នាក់ ក្នុងនោះបាត់បង់ជីវិត៣៣នាក់ និង​១០៧នាក់ ​បានជាសះស្បើយ។ 

សេចក្តីថ្លែងការណ៍​របស់ស្ថានទូត​អារ៉ាប់រួម ​ប្រចាំ​នៅប៉ាគីស្ថាន ​អះអាងថា នេះគឺជាជើង​ទីមួយ​ ខណៈជំនួយជាបន្តបន្ទាប់ទៀត ហើយការដឹកជញ្ជួន​បរិក្ខារវេជ្ជសាស្ត្រ​បែបនេះ​ មកពី​អារ៉ាប់រួម​ នឹងចូលមកដល់ប៉ាគីស្ថាន នឹងកើតមានឆាប់ៗ ដើម្បីជួយដល់រដ្ឋាភិបាល​ និងប្រជាជនប៉ាគីស្ថាន​ ក្នុងការដោះស្រាយប្រយុទ្ធប្រឆាំងនឹង​ការឆ្លងរាតត្បាត នៃ​ជំងឺ​របស់ពិភពលោក​មួយនេះ​។ 

ជំនួយ​របស់អារ៉ាប់រួម​មកឲ្យប៉ាគីស្ថាន​នោះ ជាផ្នែកមួយ​ នៃជំនួយមនុស្សធម៌​​ដែលនៅតែបន្ត កើតមាន​ជួយដល់​បងប្អូន​ពលរដ្ឋប៉ាគីស្ថាន ស្ថិតក្រោម​ទិសដៅចង្អុលបង្ហាញ​របស់មេដឹកនាំ​ប្រទេសអារ៉ាប់រួម។ នេះ​បើ​តាមការបញ្ជាក់​របស់លោក Hamad Obaid Ebrahim Salem Al Zaabi ឯកអគ្គរាជទូត​អារ៉ាប់រួម ប្រចាំ​នៅប៉ាគីស្ថាន សរសេរ​នៅលើបណ្តាញ​សង្គម Tweet។ «ការប្តេជ្ញាចិត្ត​របស់យើង​ ចំពោះវិធីសាស្ត្រ និងគោលការណ៍​មនុស្សធម៌​ ដើម្បីជួយដល់ប្រជាជន​ ​នៅក្នុងស្ថានភាព​មិនមានដែនកំណត់»។ 

អារ៉ាប់រួម​​​ ជាពេលវេលាថ្មីម្តងទៀត ​បានប្រញាប់ប្រញាល់​ជួយដល់​ប៉ាគីស្ថាន​​ ខណៈប្រជាជនប៉ាគីស្ថាន​ត្រូវការ​​ជំនួយ​បន្ទាន់។ អារ៉ាប់រួម បានផ្តល់ជំនួយ​ទាន់ពេលវេលា ជួយដល់ប៉ាគីស្ថាន​​ បន្ទាប់ពីជួបគ្រោះ​នានា ដូចជាការរញ្ជួយដី គ្រោះទឹកជំនន់ និងសង្គ្រាម​ប្រឆាំងនឹងភេរវកម្ម​ ជាដើម។ ជំនួយមនុស្សធម៌របស់អារ៉ាប់រួម​ នៅប៉ាគីស្ថាន ​គ្របដណ្តប់លើវិស័យ​ជាច្រើន​ មានដូចជា វិស័យអប់រំ, ហេដ្ឋារចនាសម្ព័ន្ធ, ធារាសាស្ត្រ,​ គាំពារ​សុខាភិបាល និងលុប​បំបាត់​ជំងឺ​ស្វិតដៃជើង ។

គួរបញ្ជាក់ថា ប្រទេសអារ៉ាប់រួម (United Arab Emirates) ក៏ជាប្រទេស​មានអ្នកឆ្លង COVID-19 ផងដែរ ។ ប្រទេសនេះ​មានអ្នកឆ្លង សរុប ១ ៨៨៥ នាក់ ក្នុងនោះ២១នាក់បានបាត់បង់ជីវិត និង​៣២៨នាក់​បានជាសះស្បើយ​៕ ប្រែសម្រួលដោយ៖ thach yat

from： https://tnaot.com/km/m/detail/article/9100459