Sign In 
ប្រភពព័ត៌មានរ៉យទ័រ បានផ្សាយថា រដ្ឋាភិបាលអាហ្វហ្គានីស្ថាន បានដោះលែងអ្នកទោសតាលីបង់ចំនួន១០០នាក់ នៅថ្ងៃទី២ ខែមេសា ឆ្នាំ២០២០ ។ មន្ត្រីសន្តិសុខជាន់ខ្ពស់មួយរូបបានអះអាងដូច្នេះជាមួយប្រភពព័ត៌មាន ហើយថា ការដោះលែងនេះ គឺជាការដោះដូរអ្នកទោសគ្នា ខណៈក្រុមតាលីបង់នឹងដោះលែងកងកម្លាំងសន្តិសុខអាហ្វហ្គានីស្ថាន២០នាក់វិញផងដែរ ។ 
ការដោះដូរអ្នកទោសគ្នានេះ ជាផ្នែកមួយស្តីពីវិធានការកសាងទំនុកចិត្តគ្នា ដើម្បីសម្រុះសម្រួលឲ្យបានជោគជ័យកិច្ចព្រមព្រៀងសន្តិភាពដែលបានចុះហត្ថលេខារវាងសហរដ្ឋអាមេរិក និងក្រុមតាលីបង់ឈានដល់បញ្ចប់សង្គ្រាមអូសបន្លាយពេលជិត២ទសវត្សរ៍នៅអាហ្វហ្គានីស្ថាននោះ ។
ការដោះលែងអ្នកទោសសកម្មប្រយុទ្ធតាលីបង់១០០នាក់នេះ គឺជាជំហានដំបូងឆ្ពោះទៅរកការដោះដូរអ្នកទោសសរុប៦០០០នាក់ជាបន្តបន្ទាប់របស់រដ្ឋាភិបាលអាហ្វហ្គានីស្ថាន និងក្រុមឧទ្ទាម ។ 
ការដោះលែងអ្នកទោសដំណាក់កាលដំបូង១០០នាក់នេះ ខាងក្រុមឧទ្ទាមតាលីបង់ នៅមិនទាន់ចេញអត្ថាធិប្បាយបែបណានៅឡើយទេ ។
អាមេរិក និងមេដឹកនាំនយោបាយក្រុមតាលីបង់ បានចុះហត្ថលេខាលើកិច្ចព្រមព្រៀងជាប្រវត្តិសាស្ត្រនៅថ្ងៃទី ២៩ ខែកុម្ភៈ ឆ្នាំ២០២០ នៅទីក្រុងដូហា ប្រទេសកាតា ។ កិច្ចព្រមព្រៀងនោះ ប្រសិនបើពួកតាលីបង់គោរពកិច្ចសន្យាបាន សហរដ្ឋអាមេរិកនឹងដកកងទ័ពទាំងស្រុងចេញពីប្រទេសអាហ្វហ្កានីស្ថាន ក្នុងរយៈពេល១៤ខែ ។ 
ក្នុងរវាង១៣៥ថ្ងៃ គិតពីថ្ងៃចុះហត្ថលេខា អាមេរិកនឹងចាប់ផ្តើមដកទ័ពចេញពីអាហ្វហ្កានីស្ថាន ពី១៣០០០នាក់ ឱ្យមកនៅត្រឹម ៨៦០០នាក់។ កងទ័ពពាក់កណ្តាលទៀត នឹងត្រូវអាមេរិកព្រមទាំងសម្ព័ន្ធមិត្ត ដកចេញឱ្យអស់ នៅរវាង១៤ខែទៀត ។ ភាគីទាំងពីរក៏បានព្រមព្រៀងគ្នាដោះដូរអ្នកទោស ដែលមានចំនួនរាប់ពាន់នាក់ ៕ ប្រែសម្រួលដោយ៖ thach yat
