បាល់ទាត់៖ លោក ស៊ុំ វណ្ណា គ្រូបង្វឹកក្រុមភ្នំពេញក្រោនបានសម្ដែងការបារម្ភជាខ្លាំង ចំពោះការធ្លាក់ចុះទម្រង់លេងរបស់ក្រុម ក្រោយសម្រាកការប្រមូលផ្ដុំបណ្ដោះអាសន្ន ដោយសារការរាតត្បាតជំងឺ Covid-19 ទោះបីចាប់ផ្ដើមរដូវកាលអតីតក្រុមជើងឯក ៦សម័យកាលនេះធ្វើបានល្អយ៉ាងណាក៏ដោយ។ អតីតគ្រូបង្វឹកក្រុមវេស្ទើនដដែលបានបញ្ជាក់ថា អំឡុងពេលសម្រាកនេះក្លិបបានដាក់ចេញនូវវិធានមួយចំនួន ដែលជាការផ្ដល់នូវវីដេអូបច្ចេកទេស និងការហ្វឹកហាត់ខ្លះ សម្រាប់ឲ្យកីឡាករហ្វឹកហាត់ដោយខ្លួនឯង ហើយក្នុងនាមកីឡាករអាជីព លោករំពឹងកូនក្រុមនឹងអនុវត្តតាមគោលការណ៍ក្លិប។

យ៉ាងណាក៏ដោយលោក ស៊ុំ វណ្ណា នៅតែមានការព្រួយបារម្ភចំពោះការមិនបានហ្វឹកហាត់ជុំគ្នា ពិសេសទម្រង់លេង។ លោកថា ការពីរដូវកាល Pre-Season រដូវដល់ចាប់ផ្ដើមរដូវកាល ៥ប្រកួតដំបូង លោកមិនបារម្ភដូច្នេះទេ ដ្បិតកូនក្រុមធ្វើបានល្អ តែពេលនេះខ្ញុំគិតថា ពិតជាគួរឲ្យព្រួយបារម្ភខ្លាំង។ គួរបញ្ជាក់ថា នៅដើមរដូវកាលឆ្នាំ២០២០ ក្រុមភ្នំពេញក្រោនបានចាប់ផ្ដើមយ៉ាងល្អ ដោយឆ្លងកាត់ ៥ប្រកួតឈ្នះ៤ និងស្មើ១ រកបាន ១៣ពិន្ទុ ស្មើគ្នាជាមួយក្រុមការពារតំណែងជើងឯកព្រះខ័នរាជស្វាយរៀង ដើម្បីគ្រងតំណែងកំពូលតារាងបណ្ដោះអាសន្ន។ ចំពោះការត្រឡប់មកវិញនៃលីគកំពូលកម្ពុជា នៅមិនទាន់កំណត់ច្បាស់លាស់នោះទេ ដោយរង់ចាំស្ថានភាពការរាតត្បាតជាសកលនៃវីរុស Covid-19 ស្ងប់ស្ងាត់សិន៕

from： https://tnaot.com/km/m/detail/article/9095533