Sign In 
សម្តេចក្រឡាហោម សខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានដាក់បញ្ជាឱ្យមន្ត្រីក្រោមឱវាទ ត្រូវតែសហការគ្នាជាមួយនឹងអ្នកពាក់ព័ន្ធ ដើម្បីធ្វើការទប់ស្កាត់ ករណីជួញដូរមនុស្សយកទៅប្រទេសក្រៅ ព្រមទាំងធ្វើការស្រាវជ្រាវស្វែងរកចាប់ខ្លួន ក្រុមមេខ្យល់ ដែលកំពុងតែប្រើប្រាស់ល្បិចកល់ថ្មី ក្នុងការទាក់ទាញមនុស្សឱ្យទៅជាមួយ។
ឆ្លើយតបក្នុងរឿងនេះ ក្រសួងមហាផ្ទៃ បានបើកកិច្ចប្រជុំជាមួយនឹង គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស ដោយមានការបង្ហាញនូវរបាយការណ៍ប្រចាំឆមាសទី១ ឆ្នាំ២០២០ នាថ្ងៃទី៦ ខែកក្កដា ឆ្នាំ២០២០។
ឆ្លងតាមកិច្ចប្រជុំខាងលើនេះ សម្ដេចក្រឡាហោម ស ខេង បានដាក់ចេញនូវអនុសាស្រ្តមួយចំនួន ដើម្បីធ្វើការឆ្លើយតប ទៅនឹងការដោះស្រាយបញ្ហា ជាពិសេសសម្រាប់ ចែករំលែកទៅដល់អន្តរជាតិ។
នៅក្នុងចំណុចទី៣នៃអនុសាស្រ្តនេះ សម្តេចក្រឡាហោម ស ខេង ក៏បានដាក់បញ្ជាឲ្យក្រុមការងារអនុវត្តច្បាប់ និងបន្តតាមដានស្រាវជ្រាវ ស្វែងរកមេខ្យល់ជួញដូរមនុស្ស និងល្បិចកលថ្មីៗ ដើម្បីបង្ក្រាបឲ្យបានទាន់ពេលវេលា ចៀសវាងឲ្យករណីជួញដូរមនុស្សកើតឡើងបន្តទៀត។”អង្គភាពសមត្ថកិច្ច គប្បីពង្រឹងវិន័យ និងសេចក្តីថ្លៃថ្នូររបស់កងកម្លាំងបញ្ជៀសឲ្យបានការប្រព្រឹត្តខុសឆ្គងនឹងវិន័យ ក្រមសីលធម៌វិជ្ជាជីវៈ បទបញ្ជា ដែលនាំឲ្យប្រឈមនឹងការដាក់ទោសទណ្ឌជាយថាហេតុ”។
ស្រដៀងគ្នាផងដែរ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានអចិន្ត្រៃយ៍ គ.ជ.ប.ជ បានឱ្យដឹងថា ក្នុងរយៈពេល៦ខែ ដើមឆ្នាំ២០២០ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សតាមក្រសួងស្ថាប័នរាជធានី-ខេត្ត បានបន្តសកម្មភាពការងារ តាមទិសដៅដែលបានគ្រោងទុក បើទោះបីជាបាន និងកំពុងតែប្រឈមនឹងសភាពការណ៍វិវត្តថ្មី ដែលមិនអាចប៉ាន់ស្មានបាន ពិសេសស្ថានភាពប្រែប្រួលនៃសេដ្ឋកិច្ចពិភពលោកក្នុងវិបត្តិកូវីដ-១៩ ។
ឆ្លើយតបនឹងបញ្ហានេះ គ្រប់ភាគីបានធ្វើសកម្មភាពយ៉ាងមមាញឹក ប្រចាំការនៅតាមព្រំដែន ដើម្បីរង់ចាំទទួលសង្គ្រោះពលករ ដែលវិលត្រឡប់ពីប្រទេសផ្សេងៗ តាមច្រកព្រំដែន មិនផ្លូវការទាំងយប់ទាំងថ្ងៃ ដោយបានពិនិត្យកម្ដៅ និងសុខភាព អនុវត្តគោលការណ៍ចត្តាឡីស័ក តាមវិធានសុខាភិបាល ផ្ដល់អាហារ និងត្រៀមមធ្យោបាយដឹកជញ្ជូនពួកគាត់ឱ្យបានដល់លំនៅដ្ឋាន ហើយបន្តតាមដានស្ថានភាពសុខភាព ជីវភាព ព្រមទាំងផ្ដល់សេវាតាមតម្រូវការផ្សេងៗជូនពួកគាត់៕ ដោយ៖ ត្នោត
