Sign In 
នៅថ្ងៃសុក្រនេះរដ្ឋាភិបាលថៃបានរាយការណ៍ថា ប្រទេសថៃមានករណីថ្មីនៃអ្នកឆ្លងមេរោគកូវីដ១៩ចំនួន ១៥នាក់ ដែលក្នុងនោះមាន ១៤នាក់ ជាជនជាតិថៃមកពីប្រទេសមជ្ឈិមបូព៌ា និងម្នាក់ទៀតមកពីប្រទេសជប៉ុន។
លោក Taweesilp Visanuyothin អ្នកនាំពាក្យមជ្ឈមណ្ឌលរដ្ឋបាលស្ថានភាពមេរោគកូវីដ១៩ បានមានប្រសាសន៍ថា អ្នកជំងឺថ្មី ៤នាក់ដំបូងមកពីប្រទេសអេស៊ីប។ ពួកគេជាបុរសជនជាតិថៃមានអាយុ ២២, ២៣, ២៦ និង ២៨ឆ្នាំ ដែលបានមកដល់ស្រុកកំណើតនៅថ្ងៃទី ២៤ ខែកក្កដា ហើយត្រូវបានដាក់ឱ្យនៅដាច់ដោយឡែកក្នុងខេត្តឈុនបូរី និងធ្វើតេស្តវិជ្ជមាននៅថ្ងៃទី១២ ខែសីហា។ អ្នកជំងឺថ្មីចំនួន ១០នាក់ ឯទៀតជាជនជាតិថៃត្រឡប់មកពីប្រទេសអារ៉ាប៊ីសាអូឌីត។ ក្នុងនោះមាន ៩នាក់ ជានិស្សិតប្រុសមានអាយុចន្លោះពី ២៤-២៨ឆ្នាំ និងម្នាក់ទៀតជាបុរសជនជាតិថៃអាយុ ៤៣ឆ្នាំ ធ្វើការនៅរោងចក្រ។ ពួកគេបានមកដល់ប្រទេសថៃកាលពីថ្ងៃទី២៥ ខែកក្កដា ហើយត្រូវបានដាក់ឱ្យនៅដាច់ដោយឡែកក្នុងខេត្ត ឈុនបូរី និងបានធ្វើតេស្តវិជ្ជមាននៅថ្ងៃពុធ ទី១១ ខែសីហា។ អ្នកជំងឺថ្មីទី ១៥ ជាពលករថៃ ភេទប្រុស អាយុ ២៩ឆ្នាំមកពីប្រទេសជប៉ុន។ គាត់បានមកដល់ប្រទេសថៃនៅថ្ងៃទី៣១ ខែកក្កដា ហើយត្រូវបានដាក់ឱ្យនៅដាច់ដោយឡែកក្នុងខេត្ត Samut Prakan និងបានធ្វើតេស្តវិជ្ជមានកាលពីថ្ងៃពុធ ទី៥ ខែសីហា។
គិតមកដល់ពេលនេះ ជនជាតិថៃដែលមកពីប្រទេសអារ៉ាប៊ីសាអូឌីតមានអត្រាឆ្លងជំងឺចំនួន ១០% មកពីប្រទេសអេស៊ីប ១២% និងមកពីប្រទេសជប៉ុនចំនួន ១.៥%។ គិតមកដល់ថ្ងៃនេះ ប្រទេសថៃមានអ្នកឆ្លងមេរោគកូវីដ១៩សរុបចំនួន ៣ ៣៤៥នាក់ ហើយក្នុងនោះមាន ៣ ១៤៨នាក់ បានជាសះស្បើយ និងបន្សល់ទុកអ្នកជំងឺចំនួន ១៣៩ នាក់ សម្រាកព្យាបាលនៅក្នុងមន្ទីរពេទ្យ ចំណែកឯអ្នកស្លាប់នៅរក្សាចំនួន ៥៨នាក់ ដដែល៕
កែសម្រួលដោយ៖ ភារ៉ា
ប្រភព៖ bangkok post
