Sign In 
រដ្ឋបាលជលផលខេត្តក្រចេះ បានព្រមានចាត់វិធានការ ចំពោះអាជីវករទាំងឡាយណា ដែលហ៊ានធ្វើការ ដឹកជញ្ជូនប្រភេទត្រីមួយចំនួន ដែលជិតផុតពូជ ដើម្បីយកទៅលក់ដូរនៅលើទីផ្សារ។
នាយខណ្ឌរដ្ឋបាលជលផល និងជាប្រធានឆ្មាំអភិរក្ស លោក ម៉ុក ពន្លក បានដឹកនាំកម្លាំង ចុះទៅបង្រ្កាបករណីបទល្មើសនេសាទខុសច្បាប់ជាទ្រង់ទ្រាយធំ ព្រមទាំងបានធ្វើការណែនាំអប់រំផ្សព្វផ្សាយដល់អាជីវករលក់ត្រី ដោយហាមមិនឱ្យទិញ លក់និងដឹកជញ្ជូនប្រភេទត្រី ដែលកំពុងរងគ្រោះ ជិតផុតពូជ និងនេសាទដោយឧបករណ៍ខុសច្បាប់ឡើយ។
លោក ម៉ុក ពន្លក បានព្រមានថា អាជ្ញាធរនិងចាត់វិធានការច្បាប់ ទៅលើអាជីវករទាំងឡាយណា ដែលមិនព្រមស្ដាប់ការណែនាំរបស់មន្ត្រីជំនាញ ហើយនៅតែបន្តទិញលក់ប្រភេទត្រី ដែលមន្ត្រីជំនាញបានអប់រំណែនាំ និងធ្វើកិច្ចសន្យារួចហើយនោះ។
ចំពោះប្រភេទធនធានត្រី ដែលកំពុងរងគ្រោះជិតផុតពូជមានចំនួន២៩ប្រភេទ ដែលមានឈ្មោះដូចនៅលើរូបផ្ទាំងស្ទីកឃ័រ ដែលមន្ត្រីជំនាញបានចែកជូន អាជីវករនិងបិទនៅតាមទីផ្សារ។
ហើយត្រីដែលមានលក់លើទីផ្សារ ក្នុងខេត្តក្រចេះ ប្រចាំថ្ងៃដែលត្រូវហាមឃាត់រួមមាន៖ ត្រីក្របី ត្រីត្រសក់ ត្រីគល់រាំង ត្រីរមាស ត្រីត្រចៀកដំរី អណ្ដើកទឹក និងកន្ទាយក្បាលកង្កែប ជាដើម។ ដោយ៖ត្នោត
