Sign In 
ភ្នំពេញ៖ កីឡាករដ៏ល្បីឈ្មោះ លោក ឡុង សាលវ័ន្ត ដែលមានឈ្មោះពិតថា ពិន សំណាង ដែលបច្ចុប្បន្នលោកគឺជាគ្រូបង្វឹកជម្រើសជាតិ បន្ថែមលើតួនាទីជាប្រធានក្លិបប្រដាល់ធំមួយកន្លែង។
យ៉ាងណាមិញ បើដឹងពីស្ថានភាពជីវិតពិតរបស់លោកទើបគួរឱ្យសង្វេគ ដោយសារតែលោកត្រូវបង្ខំចិត្តធ្វើការជាសន្តិសុខនៅពេលយប់បន្ថែម និងអះអាងថាបានសម្រាកមិនលើសពី៤ម៉ោងទេ ជារៀងរាល់ថ្ងៃ ដើម្បីរកលុយមកទប់ក្នុងក្លិបដែលខ្លួនស្រឡាញ់។
ជាពិសេសមិនត្រឹមតែប៉ុណ្ណោះលោកត្រូវទទួលរ៉ាប់រងនូវកូនសិស្សចំនួន១៥នាក់ទៀតផង ប៉ុន្តែលោកមិនត្អូញត្អែរទេ បើទោះជាក្នុងពេលខ្លះ លោកចង់រត់ចោលនៅពេលមានបញ្ហាហិរញ្ញវត្ថុម្ដងៗ ។ លោកនិយាយថា«រាល់ថ្ងៃខ្ញុំមានកូន៤នាក់ប្រុស១ស្រី៣សុទ្ធតែនៅពេញរៀន និងអត់ទាន់ធ្វើការអីកើតទេ ហើយខ្ញុំត្រូវរ៉ាប់រងកូនសិស្សក្នុងក្លិប១៥នាក់ទៀត ។ បើនិយាយពីរឿងលំបាកគឺមហាលំបាក ព្រោះយូរម្ដងៗទើបមានគេជួយអង្ករ១បេ ឬ២បេ និង លុយ១០០ដុល្លារជាដើម ។
អ៊ីចឹងបើខ្ញុំទោរទន់មិនប្រឹងកូនសិស្សខ្ញុំនឹងអត់បាយ»។ លោកក៏បន្តទៀតថា«រាល់ថ្ងៃអារឿងជីវភាពវាលំបាកហើយ ប៉ុន្តែលំបាកមួយទៀតគឺកីឡាករ ព្រោះមួយខែគេឱ្យយើងដាក់កីឡាករបានតែ៥នាក់ទេឡើងវ៉ៃ ដល់អ៊ីចឹងកីឡាករយើងមានដល់១៥នាក់ មានអ្នកខ្លះត្រូវទៅស្រុក ដោយសាររកលុយអត់បាន ត្រង់ហ្នឹងហើយដែលខ្ញុំថាលំបាក»។ ចុងក្រោយលោកក៏បានសំណូមពរដល់មហាជននានា ដែលស្រឡាញ់ប្រភេទកីឡាប្រដាល់គុនខ្មែរ សូមជួយគាំទ្រលើកទឹកចិត្តជ្រោមជ្រែងជាសម្ភារ ឬថវិកាដល់កីឡាករ ឬក្លិបដែលមានការខ្វះខាត ទោះតិចក្តី ច្រើនក្តី ដើម្បីជួយជំរុញលើកកម្ពស់វិស័យប្រដាល់គុនខ្មែរឱ្យកាន់តែរីកចម្រើនបន្ថែមទៀត ៕ អត្ថបទដោយ៖ ត្នោត
