Sign In 
រដ្ឋបាលខេត្តព្រះសីហនុ បានធ្វើការអំពាវនាវ ដល់ម្ចាស់ក្រុមហ៊ុន ដឹកជញ្ជូនដោយជលយាន ភ្ញៀវទេសចរ ប្រជាពលរដ្ឋ និងអ្នកប្រជានេសាទទាំងអស់ ឱ្យមានការប្រុងប្រយ័ត្នខ្ពស់ និងផ្អាកការធ្វើដំណើរតាមផ្លូវទឹក ក្នុងអំឡុងពេលនេះ។ នេះបើយោងតាមសេចក្តីជូនដំណឹង របស់រដ្ឋបាលខេត្តព្រះសីហនុ។
នៅក្នុងសេចក្តីជូនដំណឹងដដែលនេះបានឱ្យដឹងថា ចាប់ពីថ្ងៃទី ៣១ ខែកក្កដា ឆ្នាំ២០២០ សម្ពាធទាបសកម្មមួយ បានកើតឡើងនៅលើសមុទ្រចិនខាងត្បូង ហើយបានវិវត្តន៍ទៅជាវិសម្ពាធទាប (Tropical Depression)។
វិសម្ពាធទាបនេះ បានបង្កើនឥទ្ធិពលជាបន្តបន្ទាប់ទៅជាព្យុះទី ៣ ឈ្មោះ ស៊ីនឡាគូ_(SINLAKU) ហើយបានបោកបក់មកកាន់តំបន់ភ្នំ និងឆ្នេរសមុទ្រកម្ពុជា បណ្តាលឱ្យ មានភ្លៀងធ្លាក់ច្រើន និងខ្យល់បក់បោកខ្លាំង។
ស្ថានភាពអាកាសធាតុបែបនេះ អាចធ្វើឱ្យខេត្តព្រះសីហនុ ចាប់ពីថ្ងៃទី១ ដល់ថ្ងៃទី៥ ខែសីហា ឆ្នាំ២០២០ មានភ្លៀងធ្លាក់ច្រើន ប្រឈមនឹងជំនន់ទឹកភ្លៀង (Flash Flood) រួមជាមួយខ្យល់បក់បោកខ្លាំង និងរលកសមុទ្រខ្ពស់ៗផងដែរ។
អាជ្ញាធរខេត្តព្រះសីហនុ បានធ្វើការអំពាវនាវឱ្យប្រជាពលរដ្ឋមានការប្រុងប្រយ័ត្ន គ្រោះធម្មជាតិជាយថាហេតុ ដែលអាចកើតឡើង នាប៉ុន្មានថ្ងៃខាងមុខនេះ៕ ដោយ៖ត្នោត
