ភ្នំពេញ​៖ យុវជនម្នាក់បែកក្បាលស្លាប់ភ្លាមៗ​នៅ​នឹង​កន្លែង ដោយសារជិះម៉ូតូប៉ះដៃចង្កូតជាមួយរថយន្តទេសចរណ៍មួយគ្រឿង ដូលខ្ទាតចូលក្រោមរថយន្ត បណ្តាល​រថយន្ត​កិន​ស្លាប់។

ហេតុការណ៍នេះ កើតឡើង​កាលពីវេលាម៉ោង ២ និង ២០នាទី រសៀលថ្ងៃទី១​ សីហា​ នៅចំណុចមុខផ្សារជម្ពូវ័ន​ តាមបណ្តោយផ្លូវជាតិលេខ៤​ ស្ថិតក្នុងភូមិជម្ពូ​វ័ន​១​ សង្កាត់ចោមចៅទី៣​ ខណ្ឌពោធិ៍សែនជ័យ​ រាជធានីភ្នំពេញ។​

ម្ចាស់រថយន្តបានព្យាយាមគេចខ្លួន តែត្រូវប្រជាការពារឃាត់បាននៅចំណុចរង្វង់មូលចោមចៅ ខណៈជនរងគ្រោះឈ្មោះ ឡូន សៀង​លី​ ភេទប្រុស អាយុ ១៦​ឆ្នាំ​ ជាសិស្សសាលា NCIC​ ថ្នាក់ទី៧ បច្ចុប្បន្នស្នាក់ផ្ទះជួល នៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យក្បែរ កន្លែងកើតហេតុ មានស្រុកកំណើត នៅស្រុកកំពង់ស្វាយ ខេត្តកំពង់ធំ​។

ចំណែកម្ចាស់រថយន្តបង្កមានឈ្មោះ លួនសៀង អាយុ ២៦ឆ្នាំ បច្ចុប្បន្នស្នាក់នៅខេត្តកំពង់ស្ពឺ មានស្រុកកំណើតនៅខេត្តកំពត។

តាមសាក្សីនៅកន្លែងកើតហេតុ ​មុនពេលកើតហេតុ គេឃើញ​រថយន្តកូរ៉េ​មួយគ្រឿង ធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែមានម៉ូតូមួយគ្រឿង ម៉ាកហុងដា ស៊េរីឆ្នាំ២០២០​ ពណ៍ខ្មៅ​ ពាក់ស្លាកលេខ កំពង់ធំ 1-K 7116 បើកបរដោយយុវជនម្នាក់ ធ្វើដំណើរតាមមកពីក្រោយហើយបានទាក់ដៃចង្កូតជាមួយរថយន្តទេសចរណ៍មួយគ្រឿងទៀត បណ្តាលឲ្យដួលចូលក្រោមរថយន្តកូរ៉េ​ ពាក់ស្លាកលេខកំពង់ចាម 3A-5449 កិនស្លាប់យ៉ាងអាណោចអាធម៍​។ ភ្លាមនោះរថយន្តបានបន្តដំណើរទៅមុខទៀត រហូតដល់រង្វង់មូលចោមចៅ ទើបត្រូវ ប្រជាការពារដេញឃាត់បានតែម្តង។ ក្រោយកើតហេតុម្ចាស់រថយន្ត ត្រូវបានបញ្ជូនទៅប៉ុស្តិ៍នគរបាលរដ្ឋបាលចោមចៅទី៣ បណ្ដោះអាសន្ន រង់ចាំមន្ត្រីជំនាញមកវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ជើងគោក ដើម្បី​ដោះស្រាយតាមច្បាប់ ចំណែកសពត្រូវសមត្ថកិច្ចទំនាក់ទំនងទៅគ្រួសារយកទៅធ្វើបុណ្យតាមប្រពៃណីនៅស្រុកកំណើត៕

ដោយ​៖ ផេង ភាព

from： https://tnaot.com/km/m/detail/article/9547135