Sign In 
ទីក្រុងហាណូយ ៖ នៅថ្ងៃទី២២ កញ្ញា ២០២០នេះ តុលាការប្រទេសវៀតណាម បានកាត់ទោសមនុស្សចំនួន ២០នាក់ ឲ្យជាប់ពន្ធនាគារ ចន្លោះពី២ ទៅ ២៤ឆ្នាំ ពីបទភេរវកម្ម បំផ្ទុះគ្រាប់បែក នៅក្នុងស្ថានីយ៍ប៉ូលីសមួយ កាលពី២ឆ្នាំមុន នេះបើយោងតាមទីភ្នាក់ងារព័ត៌មាន រ៉យទ័រ ។
តុលាការក្រុងហូជីមិញ បានរកឃើញ និងផ្តន្ទាទោសជនជាប់ចោទ ចំនួន១៧នាក់ ដែលជាប់ចោទពីបទភេរវកម្ម ហើយ៣នាក់ទៀត ជាប់ចោទពីបទប្រើប្រាស់គ្រឿងផ្ទុះខុសច្បាប់ ។
ដោយឡែក មន្ត្រីនគរបាល ជាន់ខ្ពស់របស់វៀតណាម បាននិយាយ នៅមុនការកាត់ក្តី កាលពីសប្តាហ៍មុនថា ក្រុមជនជាប់ចោទ បានទទួលប្រាក់ពីអង្គការនិរទេសមួយឈ្មោះទៀវដាយវៀត ដើម្បីទិញគ្រឿងផ្ទុះ និងបំផ្ទុះ ជាអ្វីដែលប៉ូលីសហៅថា “សកម្មភាពភេរវកម្ម ដើម្បីផ្ដួលរំលំរដ្ឋវៀតណាម” ។
មន្ត្រីនគរបាល បន្តថា ក្រុមនេះ បានបំផ្ទុះគ្រាប់បែកចំនួន២គ្រាប់ នៅឯប៉ុស្តិ៍ប៉ូលិសមួយ បណ្តាលឲ្យមនុស្សបីនាក់រងរបួស ។
ក្រុមនេះ មានបាវចនា គឺ “ឆេះទាំងអស់” “សម្លាប់ទាំងអស់” “បំផ្លាញទាំងអស់” “លួចទាំងអស់” ។
មន្ត្រីនគរបាលដដែល បានបញ្ជាក់ថា អង្គការទៀវដាយវៀត ត្រូវបានបង្កើតឡើងដោយលោក Ngo Van Hoang Hung ដែលបានរត់គេចចេញពីពន្ធនាគារក្នុងឆ្នាំ១៩៨២ ហើយបានភៀសខ្លួនទៅប្រទេសកាណាដា ៕ផ្តល់សិទ្ធដោយ៖កោះសន្តិភាព
