សេចក្ដីក្លាហាន

” សេចក្ដីក្លាហាន គឺជាវត្តមាននៃកូនសោសម្រាប់ចាក់នៅក្នុងជីវិតដើម្បីឲ្យខ្លួនយើង ហ៊ាន។ ហ៊ានសាក ហ៊ានធ្វើ ហ៊ាននិយាយ ហ៊ានសួរ ហ៊ានឆ្ងល់ ហ៊ានឆ្លើយ ហ៊ានទទួលកំហុស ហ៊ានកែប្រែ។ វាមិនមានអ្វីដែលពិបាកនោះឡើយដោយគ្រាន់តែរៀនបណ្ដុះនូវចិត្តរបស់យើងឲ្យហ៊ាន។ “

យើងបានកសាងក្ដីស្រមៃរៀងៗខ្លួន ផ្សេងៗគ្នា។ អ្នកខ្លះក៏មានភាពក្លាហានក្នុងការឈានធ្វើដំណើរទៅរកវា ប៉ុន្តែអ្នកខ្លះទៀតនៅមិនទាន់មានភាពក្លាហាននៅឡើយដើម្បីឈានដើរទៅរកក្ដីស្រមៃរបស់ខ្លួន។ ភាពក្លាហានវាប្រៀបបាននឹងកូនសោដែលចាក់អ្នកឲ្យដើរ ចាក់អ្នកឲ្យហ៊ានក្នុងការធ្វើ។ វាមិនខុសនោះទេបើយើងគ្រាន់តែហ៊ានចាប់ផ្ដើមធ្វើ ដើម្បីក្ដីស្រមៃរបស់យើង ឲ្យតែវាមិនប៉ះពាល់ដល់អ្នកណាម្នាក់។ រស់នៅក្នុងភាពក្លាហាន វាមានតម្លៃជាងរស់នៅក្នុងភាពកំសាក។ ការកំសាកខ្លាចស្លាប់បានបង្រៀនអ្នកឲ្យក្លាយជាមនុស្សអាត្មានិយមដោយមិនដឹងខ្លួន។ ពេលខ្លះភាពក្លាហានវាមិនបានស្ថិតនៅក្នុងចិត្តតាំងពីកំណើតរបស់យើងនោះឡើយ ប៉ុន្តែយើងអាចបណ្ដុះវាបានដោយសមត្ថភាពរបស់យើង។ ការជម្នះភាពស្ទាក់ស្ទើរបានគឺស្ថិតនៅលើសមត្ថភាព និងចំណេះដឹងរបស់យើងផងដែរ បើសិនជាយើងមានសមត្ថភាពពិត ចំណេះដឹងពិតនោះយើងនឹងមានភាពក្លាហានក្នុងការធ្វើ ក៏ដូចជាក្នុងការនិយាយ។

មនុស្សពេលខ្លះមានភាពក្លាហានក្នុងការធ្វើ ប៉ុន្តែមិនមាន ភាពក្លាហានក្នុងការទទួលកំហុស។ ចួនកាលយើងបានសាងកំហុសអ្វីមួយដោយអចេតនា ប៉ុន្តែយើងមិនមានភាពក្លាហាននឹងទទួលស្គាល់ថាយើងខុសនោះឡើយ នេះជាបរាជ័យមួយដ៏ធំធេងព្រោះយើងមិនមានភាពក្លាហានក្នុងការទទួលស្គាល់វាដើម្បីយកមកកែប្រែ។ បើសិនជាមានពេលខ្លះយើងមិនចេះ ឬយើងមិនយល់ យើងត្រូវមានភាពក្លាហានក្នុងការសួរ ក្នុងការឆ្ងល់ ព្រោះថាការដែលហ៊ានសួរ ហ៊ានឆ្ងល់ វាមិនបានធ្វើអ្វីឲ្យប៉ះពាល់ដល់ជីវិតរបស់យើងនោះឡើយផ្ទុយទៅវិញវាបានក្លាយទៅជំនួយដល់បញ្ញារបស់អ្នកទៅវិញ។ ចួនកាលយើងភ័យខ្លាចគេរិះគន់ គេមិនចូលចិត្ត ប៉ុន្តែបើសិនជាយើងនៅតែបន្តអារម្មណ៍បែបនេះជីវិតរបស់យើងនឹងនៅតែមិនចេះ នៅតែមិនយល់ នៅតែឆ្ងល់រហូត។ 

យើងមិនមែននៅក្មេងទៀតឡើយ យើងធំសមល្មមគ្រប់គ្រាន់ដើម្បីមានភាពជឿជាក់ និងសេចក្ដីក្លាហានក្នុងការបំពេញក្ដីស្រមៃឲ្យក្លាយជាការពិត។ ចួនកាលពាក្យសម្ដីរបស់អ្នកដទៃបានវាយបំបាក់នូវសេក្ដីក្លាហានរបស់យើង វាបានធ្វើឲ្យយើងក្លាយជាមនុស្សដែលខ្លាច មិនមានភាពជឿជាក់លើខ្លួនឯង។ កុំបណ្ដោយឲ្យសម្ដីអ្នកដទៃមកវាយបំបាក់ក្ដីស្រមៃរបស់យើងអី។ យើងត្រូវតែយកឈ្នះសម្ដីទាំងនោះដោយមានភាពក្លាហានក្នុងការចាប់ផ្ដើម។ យើងមានភាពក្លាហានក្នុងការសាងក្ដីស្រមៃរួចហើយ ដូច្នេះយើងត្រូវមានសេចក្ដីក្លាហានក្នុងការជម្នះវាឲ្យកា្លយជាការពិត។  

ទន្ទឹមនឹងក្ដីស្រមៃ ភាពក្លាហានគឺជាជំហានដំបូងដែលអ្នកត្រូវដើរ។ ត្រូវមានភាពក្លាហាន ប្រកបដោយសេចក្ដីជឿជាក់ ត្រឹមត្រូវ ទំនួលខុសត្រូវ សុចរិត សីលធម៌ តម្លាភាព អត់ធ្មត់ តស៊ូនឹងព្យាយាម។ ត្រូវមានភាពកា្លហានយល់តាមកាលៈទេសៈ មិនគឃ្លើនហ៊ានជ្រុល រួចហើយក៏ត្រូវមិនកំសាកជ្រុលដែរ។ យើងជាមនុស្សដែលឲ្យតម្លៃដល់ខ្លួនយើង និងអ្នកដទៃ។ Being brave never stop!

រូបភាព៖ pinterest

ស្នាដៃអត្ថបទ ៖ រិទ្ធី កុល្លិកា

from： https://tnaot.com/km/m/detail/article/9718164