Sign In 
ទីក្រុងហាណូយ ៖ ក្រសួងសុខាភិបាលវៀតណាម នៅថ្ងៃព្រហស្បតិ៍ទី៣០ ខែកក្កដា២០២០នេះ បានរាយការណ៍ថា មានករណីឆ្លងវីរុសកូវីដ-១៩ថ្មីចំនួន ៩ករណីបន្ថែម ដែលមានទំនាក់ទំនងទៅនឹងការផ្ទុះឡើងនៅទីក្រុងដាណាង នាំឲ្យចំនួនឆ្លងសរុបកើនដល់ ៤២នាក់ ចាប់តាំងពីវីរុសនេះបានចម្លងក្នុងសហគមន៍កាលពីចុងសប្តាហ៍ នេះបើយោងតាមទីភ្នាក់ងារសារព័ត៌មានរ៉យទ័រ ។
ក្រសួងសុខាភិបាលវៀតណាមបាននិយាយថា ក្នុងចំណោមករណីថ្មីទាំង ៩នាក់ មាន ៨នាក់មកពីដាណាង និងម្នាក់ទៀតមកពីរដ្ឋធានីហាណូយ ។ រលកថ្មីបានឆ្លងរាលដាលយ៉ាងឆាប់រហ័សដល់ទីក្រុង និងខេត្តចំនួន ៦របស់ប្រទេសវៀតណាម ក្នុងរយៈពេល ៦ថ្ងៃ ។
គិតត្រឹមព្រឹកថ្ងៃទី៣០ កក្កដា ប្រទេសវៀតណាមបានកត់ត្រាអ្នកឆ្លងកូវីដ-១៩ សរុបចំនួន ៤៥៩ ករណី និងមិនមានអ្នកស្លាប់ឡើយ ។ បច្ចុប្បន្ន មនុស្សជាង ៨១.០០០នាក់ ត្រូវបានគេដាក់ឲ្យនៅដាច់ដោយឡែកពីគ្នា ចាប់តាំងពីថ្ងៃចន្ទមក ។
កាលពីថ្ងៃពុធម្សិលមិញនេះ អាជ្ញាធរទីក្រុងហាណូយ បានបញ្ជាឲ្យបារ និងហាងនានា រួមនិងហាមឃាត់ការជួបជុំធំៗ បន្ទាប់ពីបានរកឃើញករណីទី១ នៃអ្នកឆ្លងកូវីដ-១៩ ពាក់ព័ន្ធទៅនឹងចម្លងក្នុងសហគមន៍នៅដាណាង ។
លោក ង្វៀន ឌុកជុង ប្រធានគណៈកម្មាធិការប្រជាជនទីក្រុងហាណូយ បាននិយាយនៅក្នុងសេចក្តីថ្លែងការណ៍មួយ នៅលើគេហទំព័រសាលាក្រុងថា “យើងត្រូវតែចាត់វិធានការ និងធ្វើសកម្មភាពឲ្យបានឆាប់បំផុតឥឡូវនេះ រាល់ការប្រជុំធំៗទាំងអស់នឹងត្រូវហាមឃាត់រហូតដល់មានការជូនដំណឹងបន្ថែមទៀត” ។
លោកបានបន្តថា “មនុស្សជាង ២១.០០០ នាក់ បានវិលត្រឡប់មកពីទីក្រុងដាណាង ចូលទីក្រុងហាណូយនឹងត្រូវបានត្រួតពិនិត្យយ៉ាងដិតដល់ ហើយនឹងត្រូវឆ្លងកាត់ការធ្វើតេស្តឆាប់រហ័សរកវីរុស COVID-19” ៕ ផ្តល់សិទ្ធិដោយ៖ កោះសន្តិភាព
