Sign In 
រាជធានីភ្នំពេញ៖ ការផ្តល់ឱកាសដល់អ្នកមានសមត្ថកភាពចង់ធ្វើការតាមប៉ុស្តិ៍រដ្ឋបាល សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ឲ្យដឹងថា ថ្ងៃក្រោយការរើសនគរបាលបំរើការងារតាមប៉ុស្តិ៍រដ្ឋបាលត្រូវជ្រើសរើសកូនចៅអ្នកភូមិនៅកន្លែងនឹងតែម្តង។
ថ្លែងក្នុងពិធីបិទសន្និបាតបូកសរុបលទ្ធផលនៃការអនុវត្តផែនការ យុទ្ធសាស្ត្រ រយៈពេល៥ឆ្នាំ (២០១៥-២០១៩) និងលើកទិសដៅការងារសម្រាប់រយៈ ពេល ៥ឆ្នាំ បន្តរបស់បណ្ឌិត្យសភានគរបាលកម្ពុជានៅព្រឹកមិញនេះ សម្តេចស ខេង បានគូសបញ្ជាក់ថា «យើងគិតនៅតាមភូមិភាគ គឺនៅ ពេលប្រឡងជាប់ប៉ូលិសហើយ គឺត្រូវទៅរៀននៅតាមភូមិភាគ ថ្ងៃក្រោយរហូតដល់ខ្ញុំថានៅពេលចង់ធ្វើបូលិសនៅកន្លែងណា គឺរើសអ្នកកូនចៅប្រជាជននៅកន្លែងហ្នឹង» ។
សម្តេចបន្តថា ការធ្វើបែបនេះ ដើម្បីចង់ដឹងពីអ្នកនៅខាងលើកឧទាហរណ៍ថា ៖ ផ្ញើរ១ ឬ២ ឬ៣នាក់ ហើយពេញសិទ្ធិធ្វើការផ្ទេរធ្វើឲ្យប៉ុស្តិ៍គ្មានអ្នកធ្វើការ អាហ្នឹងលេងក្បូននឹងអត់បានទេ ។ ថ្ងៃក្រោយ គឺនគរបាលណា គឺជាមនុស្សនៅឃុំនោះ កន្លងមកខ្ញុំណែនាំអីញ្ចឹង គឺឲ្យរើសមនុស្សនៅក្នុងឃុំនឹងតែម្តង ដើម្បីធ្វើប៉ូលិសនៅកន្លែងហ្នឹង ។អាឡូវស្រួលរកទេ ព្រោះថា កូនក្មួយជាប់ឌីប្លួម ឬបាក់ឌុបស្រួលណាស់ មិនដូចពីមុនទេ ប៉ូលិសមិនចេះអក្សរផង ទស្សវត្ស ៩០ប៉ុន្តែអាឡូវអស់ហើយ ចូលនិវត្តន៍អស់ហើយ ។
សម្តេចបន្ថែមថា អាឡូវនេះធ្វើប៉ូលិសឃុំ សង្កាត់ ចាំបាច់ត្រូវតែសរសេរអានអក្សរតែម្តង នៅពេលប្រទេសសុខសប្បាយ គឺល្អណាស់ ហើយមន្ត្រីនៅថ្នាក់ក្រោមភាពល្អប្រសើរពិតជាល្អថែមទៀត ។ សម្តេចក៏បានលើកឡើងថា ការធ្វើប៉ូលិសបើចេះតែទ្រឹស្តី ហើយគ្មានការអនុវត្តន៍មិនអាចទៅរួចនោះទេ ។ផ្ទុយទៅវិញបើមានតែការអនុវត្តហើយគ្មានទ្រឹស្តីក៏មិនអាចទៅរួចដែរ ដូច្នេះត្រូវតែបូកបញ្ចូលគ្នា គឺបទពិសោធន៍ និងចំណេះដឹង ។
សម្តេចថាពេលនេះសម្តេចបានយកចិត្តចំពោះសមត្ថកិច្ចថ្នាក់ស្រុក និងឃុំព្រោះថា ពួកគេបានដឹងពីសុខទុក្ខរបស់ប្រជាពលរដ្ឋផ្ទាល់តែម្តង ។ នៅពេលសមត្ថកិច្ចស្រុក ឃុំ ខ្លាំងនោះ សន្តិសុខនៅកន្លែងនោះល្អ ៕ ត្នោត
