Sign In 
ប្រទេសថៃ៖ យុវជនថៃជាច្រើនរយនាក់ កាលពីថ្ងៃទី២៦ ខែកក្កដា ឆ្នាំ២០២០ បានលើកគ្នាធ្វើបាតុកម្មនៅមុខវិមានប្រជាធិបតេយ្យក្រុងបាងកក ដើម្បីបរិហារនយោបាយ របស់រដ្ឋាភិបាល ហើយទាមទារឲ្យរដ្ឋាភិបាលនោះលាលែង។
បន្ទាប់ពីបាតុកម្មកាលពីសប្ដាហ៍មុន ដោយមនុស្សជាច្រើនពាន់នាក់ ស្លៀកពាក់ពណ៌ខ្មៅលើកគ្នាស្រែកច្រៀង បណ្ដាបទចម្រៀងរ៉ាបប្រឆាំងរដ្ឋាភិបាល ពួកបាតុករនាថ្ងៃទី២៦ កក្កដា បានលើកផ្ទាំងរូបតំណាង ឲ្យពពួកសត្វដែលគូរបែបរូបភាពតុក្កតាម៉ានហ្គាជប៉ុន ដើម្បីសម្ដែងពីការបរិហារចំពោះរដ្ឋាភិបាលអតីតប្រមុខយោធាលោកប្រាយុទ្ធចាន់អូចា។
ក្រោមការតាមឃ្លាំមើលរបស់ប៉ូលិសច្រើនសិបនាក់ ពួកបាតុករបាននាំគ្នាស្រែកច្រៀងយកលំនាំតាមបទចម្រៀង ក្នុងខ្សែភាពយន្តកំនូរជីវចលជប៉ុនរឿង HAMTARO ដោយក្នុងបទចម្រៀងនោះ មានបញ្ចូលត្រង់កន្លែងបន្ទរពាក្យថា រំលាយសភា។ ពួកបាតុករនិយាយថា ខ្ញុំចង់បានអនាគតមួយដែលមនុស្សម្នាអាចតស៊ូ ដើម្បីលទ្ធិប្រជាធិបតេយ្យ។ យើងចង់បានសិទ្ធិនោះ។
វិបត្តិសេដ្ឋកិច្ចដោយសារការឆ្លងរាលដាលនៃវីរុស COVID-19 និងការបាត់ខ្លួននាពេលថ្មីៗនេះ នូវសកម្មជននៃចលនាប្រជាធិបតេយ្យសកម្មម្នាក់ បណ្ដាលឲ្យមានការមិនសប្បាយចិត្ត ក្នុងចំណោមយុវជនជំនាន់ថ្មីដែលការមិនសប្បាយចិត្តទាំងនេះ តែងសម្បែងតាមបណ្ដាញសង្គម។
កាលពីថ្ងៃទី២៥ កក្កដា ក៏មានបាតុកម្មរបស់ពួកយុវជន នៅមុខវិមានប្រជាធិបតេយ្យទាមទារ ឲ្យលោកប្រាយទ្ធ ចាន់អូចា លាលែងចេញពីតំណែង និងទាមទារសិទ្ធិស្មើភាពក្នុងការរៀបការ។ រួចកាលពីថ្ងៃទី២៤ កក្កដា ប្រមុខយោធាថៃ ឧត្ដមសេនីយអាពីរ៉ាតគង់សោមពង្ស បានស្នើដល់ប្រជាជនថៃគ្រប់រូប ឲ្យប្រកាន់ភាពអព្យាក្រិតពិសេសក្នុងបណ្ដាញសង្គម។
ពួកអ្នកវិភាគយល់ថា ប្រទេសថៃដែលរបបរាជានិយមផ្ដាច់ការ ត្រូវបានជំនួសដោយរបបរាជានិយមអាស្រ័យរដ្ឋធម្មនុញ្ញ ក្រោយបដិវត្តន៍ឆ្នាំ១៩៣២ បានបង្ហាញពីនិន្នាការវិលទៅរកលទ្ធិផ្ដាច់ការ ក្រោមការគ្រងរាជ្យរបស់ព្រះចៅរាមាទី១០និងការកាន់អំណាចរបស់បណ្ដាឧត្ដមសេនីយ៍រាជ្ញានិយមជ្រុល ដែលនៅហែរហមព្រះអង្គ៕ ផ្តល់សិទ្ធិដោយ៖ កោះសន្តិភាព
