Sign In 
អ៊ីតាលី ៖ រដ្ឋមន្ត្រីក្រសួងកីឡា និងគោលនយោបាយយុវជន លោក Vincenzo Spadafora បាននិយាយកាលពីថ្ងៃសៅរ៍ អំពីការអនុញ្ញាតឲ្យអ្នកគាំទ្រទស្សនាផ្ទាល់ ការប្រកួតក្របខណ្ឌ Serie A រដូវកាលថ្មី ដែលចាប់ផ្តើមកាលពីថ្ងៃសៅរ៍ម្សិលមិញ។
ប្រទេសអ៊ីតាលីនឹងអនុញ្ញាតឲ្យមានអ្នកគាំទ្ររហូតដល់ ១.០០០នាក់ ចូលទស្សនាផ្ទាល់ សម្រាប់ការប្រកួតនៅក្របខណ្ឌ Serie A ចាប់ពីថ្ងៃអាទិត្យ ទី ២០ ខែ កញ្ញា នេះតទៅ បន្ទាប់ពីមានកិច្ចព្រមព្រៀងរវាងរដ្ឋបាលតំបន់ និងនាយកដ្ឋានរដ្ឋាភិបាលផ្សេងៗទៀត ជាមួយនិងការរឹតបន្តឹងតាមវិធានការទប់ស្កាត់វីរុសកូវីដ១៩ ដែលបានដាក់ចេញដោយរដ្ឋាភិបាល។
តំបន់ Emilia Romagna ដែលទឹកដីរបស់ក្រុម Parma, Sassuolo និងក្រុម Bologna រួមជាមួយតំបន់ Veneto ទឹកដីរបស់ក្រុម Verona គឺមានមូលដ្ឋានដំបូងគេ ដែលបានអនុញ្ញាតឲ្យអ្នកគាំទ្រអាចទស្សនាការប្រកួតផ្ទាល់ នៅក្នុងដែនសមត្ថកិច្ចរបស់ពួកគេ។ ប៉ុន្តែលោក Spadafora បានប្រកាសជាផ្លូវការថា វិធានការនេះ នឹងត្រូវបានពង្រីកឲ្យបានទូទាំងផ្ទៃប្រទេសតែម្តង។
សូមរំលឹកថា អ្នកគាំទ្រត្រូវបានរារាំងមិនឲ្យចូលរួមទស្សនាការប្រកួត Serie A ចាប់តាំងពីខែ មីនា ដោយសារតែការផ្ទុះឡើងនៃវីរុសកូវីដ១៩ ដោយអ៊ីតាលីគឺជាប្រទេសដំបូងគេនៅអឺរ៉ុប ដែលរងគ្រោះខ្លាំងបំផុត៕ ផ្តល់សិទ្ធិដោយ៖ កោះសន្តិភាព
