Sign In 
ខេត្តបាត់ដំបង៖ អគ្គិភ័យយ៉ាងរន្ធត់មួយបានកើតឡើង ដោយសារការធ្វេសប្រហែស ទើបបណ្ដាលឱ្យឆាបឆេះអស់ទាំងស្រុងនូវរោងឈើដ៏ធំមួយខ្នង កាលពីម៉ោង៧យប់ ថ្ងៃទី២៥ កក្កដា ឆ្នាំ២០២០ នៅក្បែរភូមិគ្រឹះលោកអភិបាលខេត្ត ស្ថិតក្នុងភូមិរំចេក៥ សង្កាត់តេនះ ក្រុងបាត់ដំបង និងបណ្ដាលឱ្យអ្នកបង្ករងរបួសផងដែរ។
សមត្ថកិច្ចបានឱ្យដឹងថា រោងឈើនោះស្ថិតនៅក្នុងបរិវេណផ្ទះរបស់អ្នកបង្កឈ្មោះ អាន ចាន់រ័ត្ន ភេទប្រុស អាយុ៣៧ឆ្នាំ មុខរបរលក់សាំង នៅចំណុចកើតហេតុខាងលើ។ រោងឈើដែលត្រូវភ្លើងឆាបឆេះនោះមានទំហំ១០ម៉ែត្រx១៥ម៉ែត្រ បានក្លាយជាផេះ ដោយសារតែអគ្គិភ័យដែលបង្កឡើងដោយម្ចាស់ផ្ទះខ្លួនឯង។
សមត្ថកិច្ចបានបញ្ជាក់ថា បើតាមការសាកសួរថា ម្ចាស់ផ្ទះនេះបានកេះដែកកេះខិតជិត ពេលខ្លួនកំពុងបូមសាំងដាក់ដប ទើបបណ្ដាលឱ្យឆាបឆេះតែម្ដង។ ប៉ុន្តែអ្វីដែលធ្វើឱ្យមានការភ្ញាក់ផ្អើល និងមានការបារម្ភបំផុតរបស់សមត្ថកិច្ចនោះ គឺដោយសារតែអគ្គិភ័យនេះបានកើតឡើងយ៉ាងសន្ធោសន្ធៅនៅក្បែរភូមិគ្រឹះលោកអភិបាលខេត្ត។
សមត្ថកិច្ចបន្តថា ពេលកើតហេតុនោះ រថយន្តពន្លត់អគ្គិភ័យបានចេញអន្តរាគមន៍យ៉ាងព្រោងព្រាត រហូតដល់បង្ក្រាបឥទ្ធិពលភ្លើងបានទាំងស្រុង តែរោងឈើដ៏ធំនោះបានក្លាយជាផេះអស់ទៅហើយ ។ ប៉ុន្តែសំណាងល្អ មិនបានឆ្លងរាលដាលដល់លំឋានដែលនៅក្បែររៗនោះឡើយ។
សមត្ថកិច្ចបានឱ្យដឹងដែរថា ម្ចាស់ផ្ទះឈ្មោះ អាន ចាន់រ័ត្ននោះ ត្រូវភ្លើងឆេះរលាកដៃខាងស្តាំ ហើយត្រូវបានគេដឹកទៅសង្គ្រោះនៅមន្ទីរពេទ្យបង្អែកខេត្ត ភ្លាមៗដែរ។ នេះជាការធ្វេសប្រហែសរបស់ម្ចាស់ផ្ទះ ដែលមានមុខរបរលក់ដូរសាំង។
មន្ត្រីជំនាញគួរតែមានវិធានការចំពោះអ្នកលក់ដូរសាំងតាមដងផ្លូវដែលគ្មានច្បាប់ទម្លាប់ ព្រោះអាចប្រឈមហានិភ័យខ្លាំងបំផុត ដែលអាចបង្កឱ្យមានគ្រោះថ្នាក់គ្រប់ពេលវេលា៕ ផ្តល់សិទ្ធិដោយ៖ កោះសន្តិភាព
