Sign In 
ខេត្តបន្ទាយមានជ័យ ៖ ផ្សារសហគមន៍ដំបូងរបស់ខេត្តបន្ទាយមានជ័យ ចាប់ដំណើរការហើយ កាលពីរសៀលថ្ងៃទី២៤ ខែកក្កដា ឆ្នាំ២០២០នេះ ផ្សារនេះលក់តែ៣ថ្ងៃប៉ុណ្ណោះក្នុងមួយសប្តាហ៍គឺ (ថ្ងៃសុក្រ-សៅរ៍-អាទិត្យ)។ ជាមួយការដំណើរការផ្សារសហគមន៍ រដ្ឋបាលខេត្តបន្ទាយមានជ័យ ក៏បានរៀបចំដាក់ឲ្យមានជាវិថីម្ហូបអាហារ សម្រាប់បងប្អូនពលរដ្ឋមកលេងកំសាន្ត និងពិសារចំណីអាហារនៅទីនោះផងដែរ។
ផ្សារសហគមន៍នេះ ជាការលើកកម្ពស់ជីវភាពកសិករ ជាអ្នកផលិត មានទីផ្សារ ពិសេសផ្តោតសំខាន់លើបន្លែសុវត្ថិភាព ផលិតផលខ្មែរ ភូមិមួយ ផលិតផលមួយ ក្នុងការជួយលើកកម្ពស់វិស័យកសិកម្ម គ្មានជាតិគីមី យកដាក់តាំងលក់ ដែលមានទីតាំងស្ថិតនៅប៉ែកខាងជើង សួនមានជ័យ ក្រុងសិរីសោភ័ណ ខេត្តបន្ទាយមានជ័យ។
លោក អ៊ុំ រាត្រី អភិបាលនៃគណៈអភិបាលខេត្ត បានបញ្ជាក់ថា ការបង្កើតផ្សារសហគមន៍នេះឡើង ដោយមានការចង្អុរបង្ហាញពីសំណាក់លោកនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ ក្នុងន័យលើកកម្ពស់ជីវភាពបងប្អូនប្រជាពលរដ្ឋជាកសិករ ដែលដាំដុះបន្លែ និងចិញ្ចឹមសត្វ ដើម្បីយកមកដាក់តាំងលក់ផ្តោតលើបន្លែសុវត្ថិភាពគ្មានជាតិគីមី ដែលនាំឲ្យប៉ះពាល់ដល់សុខភាព។
លោកក៏បានបញ្ជាក់បន្ថែមថា ដំណើរផ្សារសហគមន៍នេះ គឺមិនដំណើររៀងរាល់ថ្ងៃនោះទេ គឺបើកឲ្យដំណើរការតែ៣ថ្ងៃប៉ុណ្ណោះ ក្នុងមួយសប្តាហ៍ គឺថ្ងៃសុក្រ-សៅរ៍-អាទិត្យតែប៉ុណ្ណោះ។
ក្នុងការលក់លក់បន្លែសហគមន៍នេះទៀតសោត លោកអភិបាលខេត្ត ក៏បានធ្វើការសំណូមពរដល់បងប្អូនកសិករដែលមកលក់បន្លែ នៅផ្សារសហគមន៍នេះ គឺជាបន្លែដែលដាំដុះដោយខ្លួនឯង ឬសហគមន៍ មិនប្រើប្រាស់ថ្នាំគីមី និងមិនមែនជាបន្លែនាំចូលពីក្រៅប្រទេសឡើយ បងប្អូនត្រូវតែមានភាពស្មោះត្រង់។
ជាមួយគ្នានោះដែរ លោក អ៊ុំ រាត្រី អំពាវនាវដល់បងប្អូនដែលមកលក់ត្រូវចូលរួមថែរក្សាអនាម័យឲ្យបានស្អាតទាំងអស់គ្នា ដើម្បីបរិស្អានក្រុង និងខេត្តរបស់យើងឲ្យមានភាពស្រស់ស្អាតជានិច្ច ដោយគ្មានសំរាម។
គូរបញ្ជាក់ផងដែរថា ៖ ផ្សារសហគមន៍ ផលិតផលខ្មែរ ភូមិមួយផលិតផលមួយនេះ គឺជាផ្សារដំបូងគេនៅក្នុងខេត្តបន្ទាយមានជ័យដែលបានបង្កើតឡើងដើម្បី ៖ ១-ផ្សព្វផ្សាយ និងលើកស្ទួយផលិតផលក្នុងស្រុកឲ្យមានទីផ្សារ។ ២-ភ្ជាប់ទំនាក់ទំនងរវាងកសិករអ្នកផលិត ទៅដល់អ្នកប្រើប្រាស់ចុងក្រោយ។ ៣-ឆ្លើយតបទៅនឹងតម្រូវការ និងបង្កើនទំនុកចិត្តរបស់អ្នកប្រើប្រាស់ក្នុងស្រុក។ និងទី៤-បង្កើនការទទួលបានតម្លៃបន្ថែមសម្រាប់អ្នកផលិត និងឈ្មួញក្នុងស្រុក។
ផ្សារសហគមន៍ខាងលើនេះក៏មានលក់បន្លែ ត្រីសាច់ជាច្រើនមុខដូចជា ៖ បន្លែសុវត្ថិភាពគ្រប់មុខ ត្រីស្រស់ៗ សាច់មាន់-ទា ប្រហុក ផ្អក ត្រីប្រៃ ត្រីងៀត។ល។ ផ្លែឈើផ្សេងៗ ដែលសុទ្ធសឹងតែជាផលិតផល ដែលផលិតដោយបងប្អូនកសិករផ្ទាល់តែម្តង ជាផលិតផលរបស់ខ្មែរតែម្តង៕ ត្នោត
