អ្នកជំនាញផ្នែកសុខាភិបាល បានព្រមានពីការឆ្លង នូវជំងឺគ្រុនផ្តាសាយធំប្រភេទ​ Influenza A H3N2 ដែលត្រូវបានសិក្សារកឃើញថា កំពុងផ្ទុះរាលដាល ទៅកាន់មនុស្សនៅក្នុងតំបន់  ដែលមានអ្នកទោសក្នុងពន្ធនាគារ ព្រះសង្ឃ និងប្រជាជន ដែលកំពុងរស់នៅក្នុងខេត្តជាច្រើន។

បើតាមការសិក្សាស្រាវជ្រាវ របស់នាយកដ្ឋានប្រយុទ្ធនឹងជំងឺឆ្លង បានរកឃើញថា ក្នុងប្រទេសកម្ពុជា នា រដូវ​ភ្លៀងធ្លាក់ ដែលជារដូវមានការឆ្លងជំងឺផ្តាសាយធំច្រើន អាចបង្កឡើងដោយមេរោគផ្តាសាយ (Sea​sonal Influenza: H1N1, H3N2, Influenza A, B )ជាដើម។ ឆ្នាំនេះជំងឺផ្តាសាយធំ ដែលត្រូវបាន​រកឃើញភាគ​ច្រើន​ គឺបណ្តាលមកពី​ Influenza A H3N2។

ជាមួយគ្នានេះ នាយកដ្ឋានប្រយុទ្ធនឹងជំងឺឆ្លង កំពុងទទួលរបាយការណ៍ ពីការកើនឡើងនៃជំងឺផ្តាសាយធំ និងមានការ​ផ្ទុះ​ជំងឺផ្តា​សាយធំជាចង្កោម នៅក្នុងពន្ធនាគារ​ ក្នុងចំណោមព្រះសង្ឃ​ និងក្នុងប្រជាជនក្នុងភូមិមួយ​ចំនួន​រួម​មាន៖ ​ខេត្តតាកែវ ព្រះវិហារ កោះកុង បាត់ដំបង បន្ទាយមានជ័យ និងអាចឆ្លងបន្តទៅ​ខេត្តដទៃ​ទៀត។ ម្យ៉ាងទៀត រដូវនេះជារដូវភ្លៀងធ្លាក់ ដែលជារដូវ មានការឆ្លងជំងឺផ្តាសាយធំក្នុងប្រទេសផងដែរ។

នាយកដ្ឋានប្រយុទ្ធនឹងជំងឺឆ្លងបានអំពាវនាវ ឱ្យមានការប្រុងប្រយ័ត្នខ្ពស់ ដើម្បីកុំឲ្យឆ្លងជំងឺផ្តាសាយធំនេះផងដែរ គឺ​(ត្រូវពាក់ម៉ាស់​ការពារ​ ឧស្សាហ៏លាងដៃ​ រក្សាគម្លាតសុវត្ថិភាព ពេលចូលរួមភ្ជុំបិណ្ឌតាមវត្តអារាម និងពេលជួបជុំ​គ្នា​ច្រើន​)។ រោគសញ្ញាជំងឺផ្តាសាយធំនេះ បង្កឡើងដោយជំងឺផ្តាសាយរួមមាន: គ្រុនក្តៅលើសពី ៣៨.៥​អង្សា​សេ និងមានក្អក ឫឈឺក និងករណីខ្លះអាចវិវត្តន៏ទៅហត់។

សម្រាប់ការព្យាបាល គឺត្រូវប្រើថ្នាំបញ្ចុះកំដៅ ផឹកទឹក​ឲ្យបានច្រើន គេងលក់ស្កប់ស្កល់ កាត់បន្ថយការហាត់ប្រាណហូបអាហារសំបូរជីវជាតិជាពិសេស វីតា​មីនសេ ការប្រើថ្នាំផ្សះគ្មានប្រសិទ្ធិភាព សំលាប់មេរោគនេះទេ ថែមទាំងសុខភាពទ្រុឌទ្រោម និងមិន​ងាយជាពីជំងឺផ្តាយទៀតផង។

អ្នកដែលមានរោគសញ្ញាជំងឺផ្តាសាយធំត្រូវនៅផ្ទះ កុំចេញទៅក្រៅ និងចៀសវាងចូលរួមពិធីជួបជុំផ្សេងៗ បើការព្យាបាល៣ថ្ងៃមិនធូរស្រាល ឫវិវត្តន៏ទៅជាហត់ខ្លាំង សូមអញ្ជើញទៅពិគ្រោះជំងឺជាមួយគ្រូពេទ្យ៕ ដោយ៖ ឃួន លក្ខិណា

from： https://tnaot.com/km/m/detail/article/9705578