Sign In 
ក្រោយពីបានលេចឮដំណឹងថា តែ ស៊ុនសូដាលីកា ដែលជាសមាជិករាំម្នាក់នៅក្នុងក្រុមរាំ OMG បានសម្រេចចិត្តចាកចេញពីក្រុមរាំដោយមិនដឹងមូលហេតុអ្វីឲ្យពិតប្រាកដ។ រហូតមកដល់ថ្ងៃទី១៧ ខែកញ្ញា ឆ្នាំ២០២០ លីកាបានចេញមុខទម្លាយរឿងរ៉ាវគ្រោះថ្នាក់ចរាចរណ៍មួយដែលបណ្តាលអោយរថយន្តរបស់នាងក្រឡាប់ខណៈពេលនាងធ្វើដំណើរទៅខេត្តកំពត ធ្វើឲ្យរងរបួសធ្ងន់ធ្ងរប្រេះឆ្អឹងខ្នងនិងតម្រូវអោយមានការវះកាត់ ស្ទើរតែអស់ជីវិតថែមទៀតផងដែលជាមូលហេតុនាងសម្រេចចិត្តក្នុងការចាកចេញពីក្រុមរាំ។ លីកាបានបង្ហោះវីដេអូមួយដោយភ្ជាប់មកជាមួយចំណងជើងដ៏តក់ស្លុតមួយថា៖
«ខ្ញុំចង់មកប្រាប់ពីបញ្ហាដែលខ្ញុំវះកាត់ឆ្អឹងខ្នង ដែលអ្នកទាំងអស់គ្នានៅមានចម្ងល់ គឺនៅថ្ងៃទី 04/05/2020 ខ្ញុំគ្រោះថ្នាក់ចរាចរណ៍ ក្រឡាប់ឡានធ្ងន់ធ្ងរ ស្ទើរតែបាត់បង់ជីវិត (ប្រេះឆ្អឹង) ខណៈពេលខ្ញុំទៅលំហែរកាយនៅកំពត។ ដោយសារតែភ្លាមៗមានសភាពធ្ងន់ធ្ងរខ្លាំងពេក ទើបខ្ញុំមិនបានប្រាប់អ្នកទាំងអស់គ្នា ខ្ញុំចាំដល់ខ្ញុំរាងស្រួលបួលបន្តិចសិន ទើបខ្ញុំអាចធ្វើចិត្តប្រាប់អ្នកទាំងអស់គ្នាបាន ស្ទើរតែបោះបង់ខ្លួនឯងចោលដោយសារតែឈឺខ្លាំងពេក ពិបាកទ្រាំខ្លាំង ជារឿងដ៏គួរឲ្យភ័យខ្លាចបំផុតក្នុងឆាកជីវិតដែលខ្ញុំមិនអាចបំភ្លេចបាន ចាំណា៎មានអ្នកលំបាកជាងអ្នកច្រើនដង តែគេនៅមិនបោះបង់ខ្លួនឯង រឹងពឹងណា សង្ឃឹមថាអ្នកទាំងអស់គ្នាធ្វើដំណើរដោយសុវិត្ថភាព នឹងមានការប្រុងប្រយ័ត្នបំផុត។»
ក្រោយពីបានឃើញបែបនេះហើយ អ្នកគាំទ្រនិងមិត្តភក្តិរបស់នាងទាំងអស់ បានជួយលើកទឹកចិត្តនិងជូនពរនាងឲ្យឆាប់ជាសះស្បើយ ទោះបីជាដឹងថាលីកាមិនអាចវិលត្រលប់មករាំបានដូចធម្មតាវិញទៀតនោះឡើយ។ គួរឲ្យដឹងផងដែរថា មូលហេតុដែលលីកាកាត់សក់ខ្លីបែបនេះ ដោយសារតែនាងបានប៉ះទង្គិចផ្នែកក្បាល ទើបគ្រូពេទ្យសម្រេចចិត្តកាត់សក់របស់នាងដើម្បីងាយស្រួលក្នុងការវះកាត់ផងដែរ៕
