Sign In 
លោក កើត រិទ្ធ ៖ ការផ្លាស់ប្តូរចៅក្រមព្រះរាជអាជ្ញាដើម្បីធានាការកាត់ក្តីដោយយុត្តិធម៌
រាជធានីភ្នំពេញ៖ ប៉ុន្មានថ្ងៃនេះព្រះរាជក្រឹត្យតែងតាំង និងផ្លាស់ប្តូរចៅក្រម និងព្រះរាជអាជ្ញាពីខេត្តមួយទៅខេត្តមួយបានធ្លាក់មកជាបន្តបន្ទាប់ ។ ក្នុងនោះលោកកើត រិទ្ធ រដ្ឋមន្ត្រីក្រសួងយុត្តិធម៌បានលើកឡើងថា ការផ្លាស់ប្តូរនេះជារឿងធម្មតា មិនមានអ្វីប្លែកទេជាការអនុវត្តស្របតាមច្បាប់កំណត់ ក្នុងគោលបំណង ដើម្បីធានាឱ្យមានកិច្ចដំណើរការការងារកាន់តែមានភាពល្អប្រសើរ និងប្រសិទ្ធភាពខ្ពស់សំដៅលើកកម្ពស់ការបម្រើសេវាយុត្តិធម៌ជូនដល់ប្រជាពលរដ្ឋ ជាពិសេស ដើម្បីធានាការកាត់សេចក្តីដោយមិនលំអៀងដោយត្រឹមត្រូវ និងដោយយុត្តិធម៌ ។
ក្រៅពីការលើកឡើងដូច្នេះ លោករដ្ឋមន្ត្រីបានជំរុញឲ្យមន្ត្រីតុលាការលើកកម្ពស់គុណភាពនៃការកាត់ក្តីឱ្យបានត្រឹមត្រូវ និងយុតិ្តធម៌ ហើយផ្តល់សេវាយុត្តិធម៌ឱ្យមានភាពងាយស្រួលឆាប់រហ័ស និងស្អាតស្អំដល់ពលរដ្ឋ ។
លោកកើត រិទ្ធថែមទាំងស្នើឲ្យចៅក្រម ព្រះរាជអាជ្ញាធរ ត្រូវប្រកាន់ខ្ជាប់នូវអភិក្រមដ៏ថ្លៃថ្លាទាំង៥ របស់ប្រមុខដឹកនាំ ធ្លាប់បានលើកឡើងគឺ «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» ។
លោករដ្ឋមន្ត្រីក្រសួងយុត្តិធម៌ បានគូសបញ្ជាក់ថា ចៅក្រម ព្រះរាជអាជ្ញា ក៏ដូចជាមន្ត្រីតុលាការទាំងអស់ ត្រូវប្រកាន់ខ្ជាប់នូវភាពម៉ឺងម៉ាត់របស់ខ្លួន ក្នុងការអនុវត្តច្បាប់ឱ្យបានត្រឹមត្រូវ ជាពិសេស គឺការវៀរចាកនូវអគិតធម៌ទាំង៤ គឺ ឆន្ទាគតិ ទោសាគតិ ភយាគតិ និងមោហោគតិ ដូចដែលចៅក្រមព្រះរាជអាជ្ញាទាំងអស់បានធ្វើសច្ចាប្រណិធាន នៅមុនពេលខ្លួនចូលកាន់តំណែង ។
លោកបានលើកឡើងដូច្នេះថា «ចៅក្រម ព្រះរាជអាជ្ញា ក៏ដូចជាមន្ត្រីតុលាការទាំងអស់ ត្រូវប្រកាន់ខ្ជាប់ឱ្យបានម៉ឺងម៉ាត់នូវវិន័យ និងក្រមសីលធម៌វិជ្ជាជីវៈរបស់ចៅក្រម និងព្រះរាជអាជ្ញា ទាំងក្នុងពេលបំពេញការងារ ទាំងក្នុងជីវភាពរស់នៅប្រចាំថ្ងៃ។ ការប្រកាន់ខ្ជាប់នូវក្រមសីលធម៌វិជ្ជាជីវៈរបស់ខ្លួន គឺជាការរួមចំណែកដ៏សំខាន់ក្នុងការលើកកម្ពស់កិត្តិយស សេចក្តីថ្លៃថ្នូរ និងកិត្យានុភាពនៃអង្គចៅក្រមខ្លួនឯង ហើយវាជាកត្តារួមចំណែកដ៏សំខាន់មិនអាចខ្វះបាន ក្នុងការពង្រឹងជំនឿទុកចិត្តពីសាធារណជនចំពោះវិស័យយុត្តិធម៌» ។
នៅក្នុងពិធីប្រកាសចូលកាន់ដំណែងចៅក្រម ព្រះរាជអាជ្ញាធរនៅខេត្តព្រះសីហនុកាលពីពីរថ្ងៃមុននេះ លោកកើត រិទ្ធ បានអះអាងថា «ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រម នឹងបន្តពង្រឹងវិធានការវិន័យ ក្រមសីលធម៌ និងភាពស្អាតស្អំរបស់អង្គចៅក្រម ដើម្បីលើកកម្ពស់កិត្តិយស និងសេចក្តីថ្លៃថ្នូររបស់អង្គចៅក្រមបន្ថែមទៀត» ៕ ផ្តល់សិទ្ធិដោយ៖ កោះសន្តិភាព
