ភ្នំពេញ៖ រកឃើញអ្នកជំងឺកូវីដ១៩ថ្មីម្នាក់ទៀត ខណៈអ្នកជាសះស្បើយមាន២នាក់។ នេះបើតាមសេចក្តីជូនព័ត៌មានរបស់ក្រសួងសុខាភិបាល នៅព្រឹកថ្ងៃទី​២៣ ខែកក្កដា ឆ្នាំ២០២០នេះ។​

អ្នកជំងឺកូវីដ១៩ថ្មីម្នាក់នោះ មានអាយុ ២៨ឆ្នាំ មានអាស័យដ្ឋាន នៅភូមិគោកត្នោត ឃុំកណ្តែត ស្រុកប្រាសាទបាគង ខេត្តសៀមរាប។ គាត់ជាអ្នកដំណើរតាមជើងហោះហើរមកពីប្រទេសរុស្ស៊ីដែលបានបន្តជើងហោះហើរនៅប្រទេសម៉ាឡេស៊ី (MH754) មកដល់កម្ពុជានៅថ្ងៃទី ១៩ ខែកក្កដា ឆ្នាំ២០២០។

ចំណែកអ្នកជាសះស្បើយ២នាក់វិញនោះ គឺបុរសខ្មែរ អាយុ២៥និង២៦ឆ្នាំ អាស័យដ្ឋាននៅភូមិចុងខ្សាច់ ឃុំទួលទទឹង ស្រុកព្រៃនប់ ខេត្តព្រះសីហនុ។ ពួកគាត់ជាអ្នកដំណើរមកពីប្រទេសឥណ្ឌូនេស៊ី បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។

គិតត្រឹមព្រឹកថ្ងៃទី ២៣ ខែកក្កដានេះ កម្ពុជារកឃើញអ្នកមានជំងឺកូវីដ១៩សុរបទាំងអស់ ១៩៨នាក់ ក្នុងនោះមានអ្នកជាសះស្បើយចំនួន១៤២នាក់​ អ្នកកំពុងសម្រាកព្យាបាលនៅមន្ទីរពេទ្យរដ្ឋចំនួន ៥៤នាក់ អ្នកសម្រាកព្យាបាលនៅបន្ទប់ដោយឡែកក្នុងស្ថានទូតអាមេរិកប្រចាំកម្ពុជា២នាក់ ជាស្ត្រីជនជាតិអាមេរិកកាំង៕ ប៊ុនធឿន​ 

from： https://tnaot.com/km/m/detail/article/9515969