Sign In 
រាជធានីភ្នំពេញ៖ ស្ត្រីជាគ្រូបង្រៀនម្នាក់ អកតញ្ញូចំពោះម្តាយហ៊ានកាន់កាប់ដីគាត់ជាង១ហិកតាកន្លះ នៅក្រុងកែប ដោយគ្មានបណ្ណកម្មសិទ្ធ ហើយថែមទាំងបានកាត់កាល បណ្តេញម្តាយចេញពីផ្ទះទៀតផង។
លោកដួង តារា អនុរដ្ឋលេខាធិការ នៃទីស្តីការគណៈរដ្ឋមន្ត្រី បានឲ្យដឹងថា លោកយាយ ដែលត្រូវកូនដេញចេញពីផ្ទះឈ្មោះ ម៉ក់ ស៊ូន អាយុ៧៤ឆ្នាំ លោកបានបន្តថា «ពិតជារន្ធត់ តើគុណធម៌ សីលធម៌ និងសេចក្តីថ្លៃថ្នូរជាមនុស្សទៅណាអស់ហើយ? ដើម្បីតែដី ដើម្បីតែលុយ មនុស្សធ្វើគ្រប់យ៉ាង សូម្បីតែម្តាយខ្លួនឯងបង្កើត! រឿងវិវាទនេះ លោកយាយខំតស៊ូមកជាង៩ឆ្នាំ ទម្រាំមានឱកាសបានដាក់លិខិតគោរពសុំជំនួយពីសម្តេចតេជោនាយករដ្ឋមន្ត្រី» ។
បើតាមការរៀបរាប់របស់លោក ដួង តារា កាលពីថ្ងៃទី១៧ កក្កដា រូបលោកក៏បានទៅមើលស្ថានភាពជាក់ស្តែង ហើយបានជួយសម្របសម្រួលផ្សះផ្សារវាងម្តាយ និងកូន ដោយមានលោកស្រីអភិបាលក្រុងកែប និងប្រធានភូមិបាលក្រុងចូលរួមផងដែរ ។ ក្នុងនាមជាម្តាយដែលមានបង្កាន់ដៃកាន់កាប់ដីស្របច្បាប់តាំងពីឆ្នាំ ១៩៩០ មក លោកយាយសុំតែកន្លះហិកតាទេ ដីនៅសល់ជាង១ហិកតាទៀតទុកអោយកូនស្រី ដើម្បីបានចែកបន្តអោយទៅកូនក្នុងបន្ទុកចុះ តែក្នុងថ្ងៃនោះអ្នកគ្រូអត់ព្រមទេ។
លោកបានបន្តថា «ខ្ញុំចប់យោបល់ ព្រោះមិនដែលជួបរឿងដែលមិនគួរជឿបែបនេះ ។ រហូតមកដល់ថ្ងៃទី ២០ កក្កដា ទើបអ្នកគ្រូដ៏មហិមានោះព្រមចែកអោយម្តាយ ។ លោកក៏សូមអរគុណលោកអភិបាលខេត្តកែប អភិបាលក្រុងកែប ប្រធានភូមិបាលក្រុង និងអាជ្ញាធរទាំងអស់ ព្រមទាំងក្រុមការងារ និងមេធាវីស្ម័គ្រចិត្តសម្តេចតេជោ ដែលបានចូលរួមផ្សះផ្សាបញ្ចប់វិវាទនេះ បានចប់ជាស្ថាពរកាលពីពេលថ្មីៗនេះ ។ ក្រោយតស៊ូរយៈពេល៩ ឆ្នាំ ទីបំផុតយុត្តិធម៌បានកើតមានចំពោះម្តាយចាស់មួយរូប ដែលមានវ័យ ៧៤ ឆ្នាំ ដែលកន្លងមកត្រូវបានកូនស្រីបង្កើតបណ្តេញចេញពីផ្ទះរស់នៅយ៉ាងលំបាកវេទនា។
ពេលនេះអាជ្ញាធរកំពុងវាស់វែងរៀបចំបណ្ណកម្មសិទ្ធិជូនភាគីទាំង២ ។ យើងចូលរួមកសាងអំពើល្អ ចែករំលែកក្តីស្រឡាញ់ និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែង ។ ជាទីបញ្ជប់ លោក ដួង តារា ក៏បានផ្ញើសារយ៉ាងចាក់ដោតផងដែរថា «កុំព្រោះតែដី! ធ្វើបុណ្យជូនម្តាយទាន់គាត់នៅរស់ ផ្តល់ស្នាមញញឹមជូនម្តាយជំនួសដោយទឹកភ្នែក ទើបទេវតាថែរក្សាយើង!» ៕ ត្នោត
