Sign In 
ខេត្តបន្ទាយមានជ័យ៖ មន្ត្រីមន្ទីរសុខាភិបាល និងការិយាល័យស្រុកប្រតិបត្តិក្រុងប៉ោយប៉ែត សហការជាមួយអាជ្ញាធរក្រុងប៉ោយប៉ែត បានចុះបាញ់ថ្នាំសម្លាប់មូសខ្លានៅ តំបន់គោលដៅ មួយចំនួនក្នុងក្រុងប៉ោយប៉ែត នារសៀលថ្ងៃទី២១ ខែកក្កដា ឆ្នាំ២០២០ ក្រោយពីអ្នកភូមិជាង១០០នាក់កើតមានជំងឺចម្លែក។
ប្រភពព័ត៌មានបានឲ្យដឹងថា រថយន្តបាញ់ថ្នាំសម្លាប់មូសខ្លាចំនួន២គ្រឿង បានធ្វើការចុះបាញ់ថ្នាំតាមផ្លូវលំៗក្នុងភូមិចំនួន២ គឺភូមិប៉ោយប៉ែត និងភូមិក្បាលកោះ សង្កាត់ប៉ោយប៉ែត ដែលជាភូមិមានអ្នកស្រុកកើតជំងឺចម្លែក ដោយមានអាការទន់ដៃទន់ជើង ក្តៅសន្ធំ កន្ទួល ឬក្រហមសាច់ជាដើម។
បើតាមលោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលប្រាប់តាមទូរស័ព្ទថា ការចុះបាញ់ថ្នាំសម្លាប់មូសខ្លានេះ គឺក្រោយឃើញស្ថានភាពក្នុងភូមិទាំងនេះ គ្មានអនាម័យ ដែលមានកន្លែងខ្លះអាចជាជម្រកមូសខ្លា ទៀតផង ហើយក៏បានណែនាំពីបញ្ហាសុខភាព ដល់ប្រជាពលរដ្ឋផងដែរ។
លោកប្រធានមន្ទីរ បានបន្តថា ក្រោយទទួលសេចក្តីរាយការណ៍ពីអាជ្ញាធរករណីអ្នកភូមិមានជំងឺ លោកក៏បានណែនាំដល់មន្ត្រីនៅការិយាល័យប្រតិបត្តក្រុងប៉ោយប៉ែត និងមណ្ឌលសុខភាព ចុះពិនិត្យ និងសង្គ្រោះពលរដ្ឋភ្លាមៗ។
លោកប្រធានមន្ទីរបញ្ជាក់ថា ចាប់ពីថ្ងៃទី១៩ ដល់ថ្ងៃ២១ ខែកក្កដា នេះ មានអ្នកជំងឺស្រី-ប្រុស១៥២នាក់ បានពិនិត្យសុខភាពនៅមន្ទីរពេទ្យ ហើយក្នុងចំណោមនេះ២២នាក់ បានយកឈាមទៅធ្វើវិភាគ នៅវិទ្យាស្ថានបាស្ទ័រភ្នំពេញ និង១១នាក់ទៀតកំពុងសម្រាកព្យាបាលក្នុងមន្ទីរពេទ្យបង្អែក ក្រុងប៉ោយប៉ែត ក្រៅពីនោះបានជាសះស្បើយ រួចក៏ត្រឡប់ទៅលំនៅដ្ឋានវិញហើយ។
លោក គាត ហ៊ុល អភិបាលក្រុងប៉ោយប៉ែត បានប្រាប់ថា ការបាញ់ថ្នាំសម្លាប់មូសខ្លានេះ និងធ្វើឡើងទូទាំងក្រុងប៉ោយប៉ែតតែម្តង ហើយនៅព្រឹកថ្ងៃទី២២ ខែកក្កដាវិញ នឹងបាញ់ថ្នាំជុំវិញផ្សារអគ្គ ឬផ្សារត្រី ស្ថិតក្នុងភូមិបាលិលេយ្យ១ រួចនឹងបន្តទៅបាញ់នៅភូមិព្រៃគប់ សង្កាត់ផ្សារកណ្តាល ជាតំបន់គោលដៅផងដែរ៕ ត្នោត
