Sign In 
ប្រទេសអង់គ្លេស៖ មនុស្សរាប់ពាន់នាក់បាននាំគ្នាតម្រង់ជួរតាមដងផ្លូវនៃទីប្រជុំជន Ashington ក្នុងតំបន់ប្រវត្តិសាស្ត្រ Northumberland ជាស្រុកកំណើតរបស់លោក Jack Charlton ដើម្បីចូលរួមគោរពវិញ្ញាណក្ខន្ធក្នុងពីធីបុណ្យសពរបស់វីរបុរសបាល់ទាត់អង់គ្លេសរូបនេះ កាលពីថ្ងៃអង្គារ។
គួររំលឹកថាលោក Jack Charlton ដែលត្រូវជាបងប្រុសបង្កើតរបស់ Sir Bobby Charlton បានទទួលមរណភាពក្នុងវ័យ៨៥ឆ្នាំ កាលពីថ្ងៃទី១០ ខែកក្កដាកន្លងទៅ។បន្ទាប់ពីត្រូវគ្រូពេទ្យធ្វើរោគវិនិច្ឆ័យថាមានជំងឺមហារីកកូនកណ្តុរកាលពីឆ្នាំមុន និងជំងឺវង្វេងស្មារតីផងដែរ។
ភាពអស្ចារ្យរបស់លោក ដែលធ្វើឱ្យប្រជាជាតិអង់គ្លេសចង់ចាំមិនភ្លេចនោះគឺ ជួយអង់គ្លេសផ្តួលក្រុមជម្រើសជាតិអាល្លឺម៉ង់ខាងលិច ដើម្បីក្លាយជាម្ចាស់ជើងឯកពានរង្វាន់បាល់ទាត់ពិភពលោកនៅក្នុងកីឡដ្ឋានជាតិ Wembley កាលពីឆ្នាំ១៩៦៦។
ក្នុងនោះគេសង្កេតថា អ្នកគាំទ្រជាច្រើនពុំសូវជាបានយកចិត្តទុកដាក់ ចំពោះគោលការណ៍ណែនាំរបស់រដ្ឋាភិបាល ពីការរក្សាគម្លាតឆ្ងាយពីសង្គម អំឡុងពេលមានកូវីដ១៩។ ដោយពួកគេបានប្រមូលផ្តុំគ្នាជាច្រើន ដើម្បីធ្វើពិធីចងចាំលោក Jack Charlton ដែលជាអតីតខ្សែការពារឆ្នើមរបស់ក្រុម Leeds United និងធ្លាប់ជាអ្នកចាត់ការទូទៅក្រុមជម្រើសជាតិអៀរឡង់អំឡុងឆ្នាំ ១៩៨៦ ដល់ ១៩៩៦ ផងដែរ៕ ផ្តល់សិទ្ធិដោយ៖ កោះសន្តិភាព
