Sign In 
ការបង្កើត និងពង្រីកទំនាក់ទំនងជាមួយអ្នកដទៃបានផ្លាស់ប្តូរហើយតាំងពីការផ្ទុះនៃជំងឺកូវីដ ១៩ កន្លងមកនេះ ។ ខណៈដែលសិក្ខាសាលា និងកម្មវិធីជួបជុំធំៗមិនត្រូវបានអនុញ្ញាតឲ្យប្រារព្ធដូចធម្មតា មនុស្សកាន់តែជួបការលំបាកក្នុងការបង្កើតទំនាក់ទំនងជាមួយគ្នាទៅវិញទៅមកដែរ ។ ជាក់ស្តែង មនុស្សនៅតែអាចទាក់ទងគ្នាតាមប្រព័ន្ធអ៊ីនធើណេតបាន ប៉ុន្តែក្រៅពីនេះហើយ អ្នកអាចពិចារណាលើវិធីសាស្ត្រខាងក្រោមនេះបានដែរ ៖
១. ការធ្វើអំពើសប្បុរសធម៌
ការផ្ទុះជំងឺកូវីដ ១៩ នេះបានបង្រៀនដល់មនុស្សថា ពួកយើងរឹងមាំជាងមុនប្រសិនបើមានការសហការ និងរួបរួមគ្នា ។ មនុស្សជាច្រើនបានផ្តល់ជាពេលវេលា ថវិកា និងការឧបត្ថម្ភដទៃទៀតដល់អ្នកដែលកំពុងរងគ្រោះធ្ងន់ធ្ងរក្នុងកំឡុងពេលនេះ ។ ហើយការធ្វើអំពើទាំងនេះក៏ជាពេលល្អក្នុងការពង្រីកទំនាក់ទំនងដែរ ។ការធ្វើការជាមួយអង្គការសប្បុរសធម៌ និងធ្វើការស្ម័គ្រចិត្តអនុញ្ញាតឲ្យអ្នកជួបមនុស្សថ្មីៗដែលអាចផ្តល់ជាមេរៀន និងឱកាសល្អៗដល់អ្នកនៅថ្ងៃមុខ ។
២. ការសរសេរ និងចែករំលែក
ជម្រើសផ្សេងទៀតដែលអ្នកអាចសាកល្បងបានរួមមានការបង្កើតនូវអ្វីដែលមានតម្លៃដែលអាចទាក់ទាញមនុស្សឲ្យស្គាល់អ្នក ។ មិនថាវាជាការសរសេរអត្ថបទផ្សព្វផ្សាយលើវេបសាយ ឬលើប្រព័ន្ធសង្គមរបស់អ្នកទេ ការធ្វើដូច្នេះអាចជួយផ្សព្វផ្សាយឈ្មោះរបស់អ្នកទៅអ្នកដែលធ្វើការក្នុងវិស័យរបស់អ្នក ឬវិស័យដែលជាប់ទាក់ទិន ។
៣. ការផ្ញើសារផ្ទាល់
ក្រៅពីមនុស្សថ្មីៗហើយ អ្នកមិនត្រូវភ្លេចមនុស្សដែលអ្នកស្គាល់ស្រាប់ទេ ហើយអ្នកមានឱកាសច្រើនដែរក្នុងការពង្រឹងទំនាក់ទំនងដែលអ្នកមានជាមួយមនុស្សទាំងនេះ ។ អ្នកត្រូវតែមានភាពអត់ធ្មត់ និងចំណាយពេលច្រើនលើការទំនាក់ទំនង ។ អ្នកគួរតែព្យាយាមសរសេរសារនីមួយៗដោយចេញពីទឹកចិត្តផ្ទាល់ មិនមែនសារមួយផ្ញើទៅមនុស្សគ្រប់គ្នាទេ ។
ជាមួយគ្នានេះដែរ អ្នកអាចចែករំលែកអ្វីដែលវិជ្ជមាន ការលើកទឹកចិត្ត និងសួរទៅពួកគេថាតើអ្នកអាចចូលរួមជួយដល់ពួកគេដែរទេប្រសិនបើពួកគេត្រូវការ ។
សកម្មភាពទាំងនេះមិនចាំបាច់ឲ្យអ្នកចំណាយថវិកាទេ ហើយវានឹងផ្តល់នូវអត្ថប្រយោជន៍ជូនអ្នកវិញជាច្រើន ៕ ផ្ដល់សិទ្ធិដោយ៖ កោះសន្តិភាព
