ក្លិប Sevilla សម្រេចចុះហត្ថលេខាយកខ្សែបម្រើប្រយុទ្ធ Suso ពីក្លិប AC Milan លើការផ្ទេរជាអចិន្ត្រៃយ៍ បន្ទាប់ពីខ្ចីជើងបានមួយរដូវកាល។

កីឡាករអន្តរជាតិអេស្ប៉ាញរូបនេះ ត្រូវបានក្លិប Milan ដាក់ឱ្យ Sevilla ខ្ចីជើងរយៈពេលមួយរដូវកាល ជាមួយលក្ខខណ្ឌទិញដាច់ផងដែរ។ យ៉ាងណាមិញ Sevilla ក៏សម្រេចទិញយកកីឡាកររូបនេះផ្តាច់កុងត្រាចាស់របស់គេនៅទឹកដីអ៊ីតាលីតែម្តង ហើយបើតាមរបាយការណ៍ចុះផ្សាយបានឱ្យដឹងថា អាណាព្យាបាល Milan ព្រមទទួលយកសំណើដែលមានតម្លៃ ២១ លានអឺរ៉ូ លើលក្ខខណ្ឌមួយនេះ។

គោលបំណងធំរបស់ Sevilla គឺចង់រក្សាខ្សែបម្រើប្រយុទ្ធ Suso ឱ្យបន្តជួយក្រុមនារដូវកាលក្រោយ បន្ទាប់ពីទើបតែទទួលបានកៅអីលេងពានរង្វាន់អឺរ៉ុប Champions League កាលពីពេលថ្មីៗនេះ ក្រោមការដឹកនាំរបស់លោក Julen Lopetegui អតីតគ្រូបង្វឹកក្លិប Real Madrid។ សម្រាប់រដូវកាលនៅសល់នេះ Sevilla នឹងបន្តលេងនៅពានរង្វាន់អឺរ៉ុបលំដាប់ទី ២ Europa League វគ្គ ១៦ ក្រុមចុងក្រោយជាមួយក្លិប Roma នាថ្ងៃទី៦ ខែសីហា ខាងមុខ៕

កែសម្រួលដោយ៖ ភារ៉ា

ប្រភព៖ livescore

from： https://tnaot.com/km/m/detail/article/9510633