Sign In 
ក្នុងករណីខ្លះ ប្រាក់ចំណូលដែលអ្នកអាចរកបានពីការងាររបស់អ្នកមិនពាក់ព័ន្ទនឹងការអប់រំ និងបទពិសោធន៍ការងាររបស់អ្នកទាំងស្រុងទេ។ ផ្ទុយមកវិញ អត្តចរិតរបស់អ្នកក៏ដើរតួយ៉ាងសំខាន់ដែរ។ ប្រសិនបើអ្នកជាមនុស្សដែលចូលចិត្តធ្វើការជាមួយមនុស្ស អ្នកគួរតែពិចារណាលើជម្រើសអាជីពមួយចំនួនដែលអ្នកមានឱកាសខ្ពស់។
១. ផ្នែក PR
ផ្នែក PR ឬ ទំនាក់ទំនងសាធារណៈ (Public Relations) ជាការងារដែលទាក់ទងនឹងការកសាងទំនាក់ទំនងជាមួយមនុស្សតាមមធ្យោបាយជាច្រើន។ ការងារនេះតម្រូវឲ្យមនុស្សចេញមុខទៅជួបមនុស្ស អ្នកកាសែត ធ្វើបទបង្ហាញ ចូលរួមការសម្ភាសន៍ និងចេញមុខនាំពាក្យពេលដែលមានបញ្ហាក្នុងស្ថាប័នផងដែរ។
២. គ្រប់គ្រងប្រព័ន្ធសង្គម
ប្រសិនបើអ្នកជាមនុស្សដែលចូលចិត្តរក្សាទំនាក់ទំនងជាមួយអ្នកដទៃទាំងនៅក្រៅ និងលើអ៊ីនធើណែតនោះ ការងារជាអ្នកគ្រប់គ្រងប្រព័ន្ធសង្គមអាចនឹងស័ក្តិសមនឹងអ្នក។ ជម្រើសទីមួយគឺអ្នកអាចធ្វើជាតារាប្រព័ន្ធសង្គម និងជម្រើសមួយទៀតគឺអ្នកអាចទៅគ្រប់គ្រងប្រព័ន្ធសង្គមឲ្យអាជីវកម្មដទៃ។
៣. គ្រប់គ្រងអាជីវកម្ម
ការគ្រប់គ្រងតម្រូវឲ្យអ្នកមានជំនាញធ្វើការជាមួយអ្នកដទៃបានដោយមានប្រសិទ្ធភាព។ អ្នកគ្រប់គ្រងដែលជោគជ័យជាមនុស្សដែលមានភាពជាអ្នកដឹកនាំ ជំនាញទំនាក់ទំនង និងជំនាញទន់ផ្សេងៗយ៉ាងច្បាស់លាស់។
៤. ការងារទាក់ទងនឹងនយោបាយ
អ្នកនយោបាយជាច្រើនបានខិតខំប្រឹងប្រែងដល់មានតំណែងដែលពួកគេកាន់កាប់ព្រោះតែសមត្ថភាពក្នុងការនិយាយរបស់ពួកគេ។ សមត្ថភាពដទៃរួមមានការដឹកនាំ ការចរចា និងការជះឥទ្ធិពលលើអ្នកដទៃជាដើម។
៥. ផ្នែកលក់
ផ្នែកលក់គឺជាជម្រើសល្អបំផុតសម្រាប់មនុស្សដែលចូលចិត្តធ្វើការជាមួយមនុស្ស និងអ្នកដែលពូកែនិយាយ។ ការទាក់ទង និងជួបជាមួយអតិថិជនថ្មីៗមានសារៈសំខាន់ណាស់សម្រាប់ការងារមួយនេះ ហើយភាគច្រើនមនុស្សដែលពូកែនិយាយមានឱកាសជោគជ័យច្រើនដែរ ព្រោះពួកគេទម្លាប់ជាមួយនឹងការសន្ទនាជាមួយមនុស្សដែលមិនដែលស្គាល់គ្នា និងតែងតែមានកម្លាំងដែលជំរុញឲ្យអតិថិជនជឿជាក់ពួកគេ ៕
ផ្តល់សិទ្ធដោយ៖កោះសន្តិភាព
