Sign In 
ខេត្តសៀមរាប ៖ រថយន្តម៉ាកសាំយ៉ុង១៥ កៅអី រត់តាក់ស៊ីដឹកម៉ូយពេញមានប្រុស ស្រី ក្មេង ចាស់ បើកបរក្នុងភាពងងុយដេកមួយភាំងភ្ញាក់ឡើងរ៉េចង្កូតទៅបុកម៉ូតូកង់បីកែច្នៃ ពេញទំហឹង បណ្តាលឱ្យធ្លាក់ទៅម្ខាងផ្លូវ ខ្ទាតមនុស្សចេញពីក្នុងឡានរាយពេញផ្លូវ បណ្តាលឱ្យស្លាប់កូនក្មេងអាយុ២ខួប ម្នាក់របួសធ្ងន់ស្រាល១៧ នាក់ បង្កការកកស្ទះពេញផ្លូវ ។
ហេតុការណ៍គ្រោះថ្នាក់ចរាចរណ៍គួរឱ្យរន្ទត់នោះបានកើតឡើង នៅថ្ងៃទី១៥ ខែកញ្ញា ឆ្នាំ២០២០ វេលាម៉ោង៧និង៤៥នាទីយប់ លើផ្លូវជាតិលេខ៦ ត្រង់ចំណុច ចន្លោះបង្គោលគីឡូម៉ែត្រលេខ៣៥១ . ៣៥២ ក្នុងភូមិកិត្តិយស ឃុំព្រៃជ្រូក ស្រុកពួក ខេត្តសៀមរាប រវាងរថយន្ត និងម៉ូតូកង់បីកែឆ្នៃ ។
បើតាមការឱ្យដឹងពីលោកវរសេនីយ៍ឯក ទេព ពុំសែន អធិការនគរបាលស្រុក បានប្រាប់នៅយប់ថ្ងៃទី១៥ ខែកញ្ញា ឆ្នាំ២០២០នេះថា ករណីគ្រោះថ្នាក់ចរាចរណ៍គួរឱ្យរន្ធត់នោះ រវាងរថយន្តម៉ាកសាំយ៉ុង ពណ៌ស១៥ កៅអី ពណ៌ស ពាក់ផ្លាកលេខភ្នំពេញ ២.M.៤៤.០៦ បើកបរដោយឈ្មោះ ឯក វាសនា ភេទប្រុស អាយុ៣៧ឆ្នាំ(របួសស្រាល)រស់នៅភូមិត្រពាំងផ្លុង ឃុំបាទី ស្រុកចន្ទ្រា ខេត្តស្វាយរៀង បើកបរទិសដៅពីកើតទៅទិសខាងលិចដឹកអ្នកដំណើរចំនួន១៥នាក់ មាន ៖ ក្មេង,ចាស់ ប្រុស ស្រី បានបុក-ម៉ូតូ កង់បីកែឆ្នៃ ម៉ាកវ៉េវ ក្រហមផលិតឆ្នាំ ២០០៦ គ្មានផ្លាកលេខ បើកបរដោយឈ្មោះ ស៊ិន សោមលយ ភេទប្រុស អាយុ៥៧ឆ្នាំ រស់នៅភូមិកិត្តិយស ឃុំព្រៃជ្រូក ស្រុកពួក ខេត្តសៀមរាប មុខរបរកម្មករភ្លើង ដឹកអ្នករួមដំណើរ ឈ្មោះ ថង.មិត្ត ភេទប្រុស អាយុ៤៩ ឆ្នាំ នៅភូមិកិត្តិយស ឃុំព្រៃជ្រូក ស្រុកពួក ខេត្តសៀមរាប បើកបរទិសដៅពីកើតទៅលិចហើយឈប់លើផ្លូវខាងជើងក្បាលទៅទិសខាងលិច បុកហើយរថយន្តបានរ៉េចង្កូតក្រឡាប់ទៅជាយផ្លូវខាងត្បូង ។
ដោយបណ្តាលឱ្យស្លាប់ក្មេង១នាក់ ឈ្មោះ សឿ ស៊ុយ អាយុ២ខួប រស់នៅភូមិស្រណាល ឃុំស្រណាល ស្រុកក្រឡាញ់ ខេត្តសៀមរាប ។ មូលហេតុខាងលើបង្កឡើង ដោយរថយន្តសាំងយ៉ុង បើកបរក្នុងល្បឿនលឿន ។ លោកបានបញ្ជាក់ទៀតថា ក្រោយពេលកើតហេតុកម្លាំងជំនាញបានចុះវាស់វែងដល់កន្លែងកើតហេតុ រួចដកហូតវត្ថុតាងពាក់ព័ន្ធ ដែលមានរថយន្តសាំងយ៉ុង និងម៉ូតូកង់បីកែឆ្នៃ យកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមនិតិវិធីច្បាប់ ។
បច្ចុប្បន្នសពក្មេង (ជនរងគ្រោះ)ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។ ចំណែក អ្នករងរបួស ធ្ងន់ស្រាល ត្រូវបានកម្លាំងជំនាញបានជួយដឹកយកទៅ សង្គ្រោះ ទៅមន្ទីរពេទ្យបង្អែកស្រុកពួក ។ រីឯអ្នកបើកបររថយន្តសាំងយ៉ុង ដែលមានរបួសស្រាលនោះ ឃាត់ខ្លួនបញ្ជូនទៅកាន់ការិយាល័យនគរបាលចរាចរណ៍ផ្លូវគោកនៃស្នងការនគរបាលខេត្តសៀមរាប ដើម្បីចាត់ការបន្តតាមនីតិវិធីច្បាប់៕ផ្តល់សិទ្ធដោយ៖កោះសន្តិភាព
