យោងតាមប៉ូលិសស្រុក Banglamung បានឱ្យដឹងថាអ្នកបើកម៉ូតូ​ម្នាក់បានស្លាប់នៅព្រឹកថ្ងៃចន្ទនេះ  បន្ទាប់ពីជួបគ្រោះចរាចរណ៍ជាមួយរថយន្តមួយគ្រឿងបើកបរដោយតៃកុងឡានមានផ្ទុកជាតិស្រវឹង។ លោក​​ Teetat Tarunjan មន្ត្រីប៉ូលិស​ Nongprue ត្រូវបានគេជូនដំណឹងអំពីគ្រោះថ្នាក់នេះនៅវេលាម៉ោង ២ និង ៣០នាទី​រំលងអធ្រាត្រនៅលើផ្លូវ​ Pattanakarn​​។ 

ប៉ូលិស​ និងអ្នកកាសែត The Pattaya News បានទៅដល់កន្លែងកើតហេតុដើម្បីពិនិត្យបុរសមិនស្គាល់អត្តសញ្ញាណម្នាក់​មានអាយុប្រហែល ៣០ឆ្នាំ ដេកស្លាប់នៅលើផ្លូវក្បែរម៉ូតូមួយគ្រឿងខូចខាតធ្ងន់ធ្ងរ​​ ។ ​ជនរងគ្រោះមានរបួសធ្ងន់ធ្ងរហើយក្រោយមកត្រូវបានពេទ្យប្រកាសថាស្លាប់នៅពេលទៅដល់មន្ទីរពេទ្យ​។ អ្នកបើកបររថយន្តម៉ាក sedan អាយុ ២៨ឆ្នាំឈ្មោះ​ Phonchai Wongtem ជាគ្រូបង្វឹកប្រដាល់ក្នុងស្រុកម្នាក់បានរង់ចាំប៉ូលិសនៅនឹងកន្លែងកើតហេតុ និងគ្មានរបួសអ្វីទេ។ ​គាត់បានសារភាពប្រាប់ប៉ូលិសថា ​បាន​សេពគ្រឿងស្រវឹងពិតមែន ប៉ុន្តែមិនបានស្រវឹងដល់ថ្នាក់ជោកជាំនោះទេ។​ គាត់បានបន្ថែមទៀតថា ​នៅពេលកំពុងបើកបរ​មានពន្លឺពណ៌សមួយជះចំផ្ទៃមុខគាត់ ហើយក្រោយមកគាត់បាន​ជ្រុលចង្កូតបុកម៉ូតូមួយគ្រឿងនិងហួសទៅបុកបង្គោលភ្លើងដែលនៅក្បែរនោះទៀត។

ប៉ូលិសកំពុងបន្តការស៊ើបអង្កេត​ដើម្បីចាត់ការតាមច្បាប់បន្តទៀត ហើយ​អ្នកបើកបររថយន្តត្រូវបានប៉ូលិសឃាត់ខ្លួននិងនាំទៅកាន់ស្នងការដ្ឋានដើម្បីសាកសួរ​បន្ត៕

កែសម្រួលដោយ៖ ភារ៉ា

ប្រភព៖ the pattaya news

from： https://tnaot.com/km/m/detail/article/9507615