Sign In 
ខេត្តសៀមរាប ៖ នាថ្ងៃទី១៣ ខែកញ្ញា ឆ្នាំ២០២០នេះ កូនឈើប្រភេទ គ្រញូង ធ្នង់ បេង នាងនួន ឈើទាល ស្រឡៅ ពពេល និងសុក្រម សរុបចំនួន១៥០០ដើម ត្រូវបាននាំយកទៅដាំនៅរមណីយដ្ឋានអង្គរក្នុងបរិវេណប្រាសាទបន្ទាយក្តី ក្រោមកិច្ចសហការរវាងអាជ្ញាធរជាតិអប្សរាជាមួយរដ្ឋបាលខេត្តសៀមរាប ដោយមានសមាសភាពចូលរួមដាំចនួនជាង៦០០ នាក់ ព្រះសង្ឃ ថ្នាក់ដឹកនាំខេត្ត ប្រធានអនុប្រធានអង្គភាពមន្ទីរស្ថាប័នក្នុងខេត្ត មន្ត្រីអាជ្ញាធរជាតិអប្សរា ប្រធាន និងបុគ្គលិកធនាគារ ក្រុមមេធាវីជួយការងារច្បាប់របស់អាជ្ញាធរជាតិអប្សរាផងដែរ។
ក្នុងនោះដែរ លោក ឡុង កុសល ប្រធាននាយកដ្ឋានផ្សព្វផ្សាយនិងជាអ្នកនាំពាក្យនៃអាជ្ញាធរជាតិអប្សរា បានលើកឡើងថា ការដាំកូនឈើនៅក្នុងឧទ្យាននេះ ជាប្រយោជន៍សម្រាប់ការរស់នៅនិងការអភិរក្សប្រាង្គប្រាសាទ រួមទាំងបម្រើឱ្យវិស័យទេសចរណ៍និងបង្កើតគម្របបៃតងដល់បរិស្ថានក្នុងតំបន់អអ្គរ ផងដែរ ព្រោះថា ដើមឈើ និងព្រៃឈើបានដើរតួនាទីដ៏សំខាន់ ក្នុងការជួយថែរក្សាដំណើរការប្រព័ន្ធអេកូ-ឡូស៊ី ជួយកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័នកាបូនិចពីបរិយាកាស។
ក្នុងឱកាសនោះ ដែរ លោក ពិន ប្រាកដ អភិបាលរងខេត្តសៀមរាប បានមានប្រសាសន៍ថា ការដាំដើមឈើពិតមានអត្ថន័យសម្រាប់ចលនាបំផុសស្មារតីប្រជាពលរដ្ឋយើង ឱ្យចេះស្រឡាញ់ និងការពារព្រៃឈើ ព្រមទាំងជួយលើកស្ទួយបរិស្ថានសង្គម និង បានឆ្លុះបញ្ចាំងឱ្យឃើញនូវការខិតខំប្រឹងប្រែងយ៉ាងសកម្មរបស់មនុស្សក្នុងការស្តារព្រៃឈើឡើងវិញ ។
លោកបន្តថាតាមរយៈ ការជួយធ្វើនិយ័តកម្មអាកាសធាតុ ជួយកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ ការស្រូបយកឧស្ម័នកាបូនិចពីបរិយាកាស និងជួយគាំពារផ្នែកបរិស្ថាន ព្រមទាំងផ្តល់នូវផលអនុផលព្រៃឈើ ជាច្រើនអនេកដល់ ប្រជាពលរដ្ឋនៅក្នុងសហគមន៍ផ្ទាល់តែម្តង។
លោកបន្តទៀតថា យើងត្រូវរួមសាមគ្គីគ្នា ដើម្បីបណ្ដុះឡើងវិញ នូវគំនិតស្រឡាញ់ព្រៃឈើ ថែរក្សាការពារព្រៃឈើ និងទស្សនៈសន្សំសំចៃក្នុង ការប្រើប្រាស់ផល និងអនុផលព្រៃឈើគ្រប់ប្រភេទ ។លោកបានស្នើឱ្យអាជ្ញាធរគ្រប់លំដាប់ថ្នាក់ មេត្តារៀបចំផែនការសកម្មភាពក្នុង ការចូលរួមថែរក្សាឱ្យបានហ្មត់ចត់ជាប្រចាំ ដើម្បីធ្វើឱ្យកូនឈើទាំងនោះលូតលាស់ ធំធាត់ឆាប់រហ័ស និងពុំបាត់បង់ទៅវិញ៕ ផ្តល់សិទ្ធដោយ៖កោះសន្តិភាព
