Sign In 
អ្នកប្រហែលគិតថា សត្វទាំងអស់ត្រូវការអុកស៊ីហ្សែន ដើម្បីរស់នៅមែនទេ? ខុសហើយ ។ ក្រុមអ្នកស្រាវជ្រាវទើបតែបានរកឃើញសារពាង្គកាយប្លែកមួយ ដែលមិនចាំបាច់ត្រូវការដកដង្ហើម។ វាគឺជាប៉ារ៉ាស៊ីតដ៏តូចរស់នៅក្នុងជាលិកាត្រីសាម៉ុង ដែលមិនត្រូវការអុកស៊ីហ្សែន ដើម្បីផលិតថាមពល។
លោក Stephen Atkinson អ្នកស្រាវជ្រាវជាន់ខ្ពស់នៃនាយកដ្ឋានមីក្រូជីវសាស្ត្រនៃសាកលវិទ្យាល័យរដ្ឋ Oregon បាននិយាយថា វាជាការបកស្រាយដ៏អស្ចារ្យមួយ ដែលបង្ហាញពីភាពមិនធម្មតានៃសត្វចម្លែកមួយនេះ។ លោក Atkinson សហនិពន្ធអត្ថបទស្តីពីការរកឃើញសត្វចម្លែកថ្មីមួយនេះ បានសរសេរពីសត្វម្យ៉ាង រស់នៅក្នុងជាលិកាត្រីសាម៉ុង ដែលមានឈ្មោះថា Henneguya Salminicola។
លោកបានប្រាប់សារព័ត៌មាន CNN ថា៖«នៅពេលយើងគិតអំពីសត្វ យើងគឺនឹងនឹកដល់សត្វពហុកោសិកា ដែលត្រូវការអុកស៊ីសែនដើម្បីរស់។ វាមិនដូចទៅនឹងបាក់តេរី ឬ ប្រូទីស ដែលមានឯកកោសិកានោះទេ។ នៅក្នុងការរកឃើញរបស់យើង យើងបង្ហាញថា យ៉ាងហោចណាស់ក៏មានសត្វពហុកោសិកាមួយដែរ ដែលមិនត្រូវការអុកស៊ីសែនដើម្បីរស់» ។
វារស់នៅក្នុងសាច់ត្រីសាម៉ុង ដោយបឺតយកជីវជាតិចេញពីត្រី ជំនួសឱ្យការដកដង្ហើមយកអុកស៊ីហ្សែនដោយខ្លួនឯង ៕(ដោយ៖ត្នោត)
