Sign In 
រាជធានីភ្នំពេញ ៖ រដ្ឋលេខាធិការនិងជាអ្នកនាំពាក្យក្រសួងសុខាភិបាល លោកជំទាវ ឱ វណ្ណឌីន បានថ្លែងឲ្យដឹងថា ស្ត្រីខ្មែរ-អាមេរិកាំងដែលបានលួចរត់ចេញពីកន្លែងធ្វើចត្តាឡីស័កនៅភ្នំពេញ ហើយទីបំផុតត្រូវបានអាជ្ញាធររកឃើញនៅខេត្តកំពង់ចាម ពេលនេះត្រូវបានដាក់ឲ្យធ្វើចត្តាឡីស័កជាថ្មីរយៈពេល១៤ថ្ងៃនៅសណ្ឋាគារមួយនៅខេត្តកំពង់ចាមតែម្តង មិនបានយកមកភ្នំពេញវិញនោះទេ ។
ជុំវិញសំណួរដែលចោទសួរ ថា តើក្រសួងសុខាភិបាលនឹងមានវិធានការបែបណា សម្រាប់ស្ត្រីរូបនេះ ឬអ្នករត់ចេញពីមណ្ឌលចត្តាឡីស័ក ដោយដាក់ទោសទណ្ឌ ឬពិន័យអ្វីទេ ដើម្បីការពារកុំឱ្យមានការរត់ចេញបែបនេះទៀត លោកជំទាវ ឱ វណ្ណឌីន បានឆ្លើយតបថា «នេះជាករណីដែលបានចាក ចេញពីកន្លែងធ្វើចត្តាឡីស័ក ដោយមិនបានស្នើសុំត្រឹមត្រូវ ដែលជាទង្វើលួចចេញដោយមិនគោរពតាមវិធានការចត្តាឡីស័កសម្រាប់គ្រប់គ្រងប្រទេសក្នុងគ្រាមានការរាតត្បាតជំងឺឆ្លងជាអន្តរជាតិនេះ។ ករណីនេះ ទាមទារពេលវេលាបន្តិចសិន ដើម្បីក្រុមការងារ ថ្នាក់ក្រោមជាតិដែលមានអាជ្ញាធរខេត្តដឹកនាំ កំពុងធ្វើការងារបន្តទៀតសិន» ។
ក្នុងនោះផងដែរ លោកជំទាវក៏បានឆ្លើយតបទៅនឹងសំណួរថាតើកន្លងមកធ្លាប់មានករណីរត់ចេញពីមណ្ឌលធ្វើចត្តាឡីស័កនេះដែរឫទេ? បើមាន តើសរុបប៉ុន្មានករណីដែរ? លោកជំទាវបានបញ្ជាក់ថាកន្លងមក ក៏មានការគេចវេសក្នុងការធ្វើតេស្តរកវីរុសកូវីដ-១៩ ក្នុងចំនួនតិចតួចណាស់ តែមិនមានការគេចវេសធ្វើចត្តាឡីស័កបែបដូចករណីស្ត្រីខ្មែរ-អាមេរិកកាំងនេះទេ។ យើងបានអប់រំណែនាំពួកគាត់ ដើម្បីព្រមព្រៀងធ្វើតេស្ត និងតាមដានសុខភាពបន្ត ។
សូមរម្លឹកថា ស្ត្រីខ្មែរ-អាមេរិក ម្នាក់ឈ្មោះ Le Vira Rose បានលួចរត់ចេញពីកន្លែងធ្វើចត្តាឡីស័ក នៅក្នុងសណ្ឋាគារមួយ នៅភ្នំពេញ កាលពីយប់ថ្ងៃទី១៧ ខែកក្កដា ឆ្នាំ២០២០ ហើយក៏ត្រូវបានរកឃើញនៅខេត្តកំពង់ចាម ។ តែអ្វីដែលគួរឲ្យកត់សម្គាល់នោះគឺស្ត្រីរូបនេះបានដើរទៅកាន់ទីកន្លែងប្រជុំជនធំៗជាច្រើន រួមទាំងជិះតាក់ស៊ីពីភ្នំពេញទៅកំពង់ចាម ចូលផ្សារធំនៅកំពង់ចាមទទួលទានអាហារ រហូតចូលហាងអ៊ុតសក់និងកាត់សក់ជាដើម ៕ ផ្តល់សិទ្ធិដោយ៖ កោះសន្តិភាព
