Sign In 
ប្រទេសរុស្ស៊ី ៖ កីឡាការិនីអូឡាំពិកផ្នែករបាំស្គីទឹកកក (Pair Skater) នាង Ekaterina Alexandrovskaya ត្រូវបានរាយការណ៍ថា បានសម្រេចបញ្ចប់ជិវិតខ្លួនឯងនៅវ័យ ២០ឆ្នាំកាលពីថ្ងៃទី១៧ ខែកក្កដាកន្លងទៅ។
បើយោងតាមសម្តីពីលោក Khekalo គ្រូបង្វឹករបស់នាងបាននិយាយកាលពីថ្ងៃសៅរ៍ថា Alexandrovskaya ដែលជាកីឡាការិនីតំណាងប្រទេសអូស្ត្រាលីចូលរួមក្នុងព្រឹត្តិការណ៍អូឡាំពិកឆ្នាំ២០១៨ នៅទីក្រុង Pyeongchang កូរ៉េខាងត្បូង បានធ្លាក់ពីលើបង្អួចអាគារជាន់ទី៦ នៅចំកណ្តាលទីក្រុងម៉ូស្គូប្រទេសរុស្ស៊ី។
បច្ចុប្បន្នមិនទាន់មានការបញ្ជាក់ជាផ្លូវការ ជុំវិញករណីស្លាប់របស់កីឡាការិនីកូនកាត់រុស្ស៊ី-អូស្ត្រាលីរូបនេះនៅឡើយទេ។ ប៉ុន្តែជាបឋមប៉ូលីសបានដាក់ការសង្ស័យថា វាអាចជាករណីធ្វើអត្តឃាតដោយខ្លួនឯង បន្ទាប់ពីពួកគេបានរកឃើញលិខិតមួយ ដែលបានសរសេរជាភាសារុស្សីថា «Lyublyu (I Love)» ដែលមានន័យថា «ខ្ញុំស្រឡាញ់» ។
លោក Khekalo បានបន្ថែមថា Alexandrovskaya បានខកខានវគ្គហ្វឹកហាត់មួយកាលពីខែមករា ហើយក្រោយមកត្រូវបានធ្វើរោគវិនិច្ឆ័យថាមានជំងឺឆ្កួតជ្រូក ដែលអាចបង្ខំឱ្យនាងបញ្ចប់អាជីពមួយនេះ។ ហើយនេះក៏ជាហេតុផល ដែលជំរុញនាងមានជំងឺបាក់ទឹកចិត្តធ្ងន់ធ្ងរថែមទៀតផង។
សូមបញ្ជាក់ថា Alexandrovskaya បានឆ្លងកាត់ការប្រកួត ព្រមទាំងឈ្នះមេដាយជាច្រើន ក្នុងនោះសមិទ្ធផលដ៏ធំក្នុងអាជីពរបស់នាងគឺ ឈ្នះមេដាយមាសព្រឹត្តិការណ៍ World Junior Championships នៅតៃប៉ិ និង Junior Grand Prix Final នៅជប៉ុន៕ ផ្តល់សិទ្ធិដោយ៖ កោះសន្តិភាព
