Sign In 
ខេត្តសៀមរាប ៖ មួយគ្រួសារជិះម៉ូតូគ្នា៤នាក់ស្របទិសគ្នាបម្រុងឆ្លងផ្លូវ ខ្វះការប្រុងប្រយ័ត្ន ខណៈរថយន្តបើកលឿនបុកពីក្រោយពេញទំហឹង បណ្តាលឱ្យស្លាប់កូនស្រីអាយុ៦ខែម្នាក់ និងរបួសធ្ងន់ស្រាល៣នាក់ គួររន្ធត់បង្កភ្ញាក់ផ្អើលនាំគ្នាឈប់មើលពេញផ្លូវ ខណៈពេលនោះត្រូវសមត្ថកិច្ចឃាត់បានទាំងរថយន្តទាំងមនុស្ស ។
ហេតុការណ៍គ្រោះថ្នាក់ចរាចរណ៍ គួរឱ្យរន្ធត់នោះបានកើតឡើង នៅថ្ងៃទី១១ ខែកញ្ញា ឆ្នាំ២០២០ វេលាម៉ោង១៧ និង១០នាទីល្ងាច ស្ថិតនៅចន្លោះបង្គោលគីឡូលេខ ៣៩៧,៣៩៨ ក្នុងភូមិស្ទឹង ឃុំបាគង ស្រុកប្រាសាទបាគង ខេត្តសៀមរាប លើផ្លូវជាតិលេខ ៦ រវាងរថយន្ត និងម៉ូតូ ។
បើតាមការឱ្យពីលោកវរសេនីយ៍ឯក លឹម សម្បត្តិ អធិការដ្ឋាននគរបាលស្រុកប្រាសាទបាគង បានប្រាប់តាមទូរស័ព្ទ នៅថ្ងៃទី១២ ខែកញ្ញា ឆ្នាំ២០២០នេះថា នៅស្រុកប្រាសាទបាគង មានរថយន្តម៉ាក លុចស៊ីស Ls460 ពណ៌សពាក់ផ្លាក់លេខភ្នំពេញ 2X3995 ក្នុងបើកបរដោយឈ្មោះ ហេង សេងហាំង ភេទប្រុស អាយុ២០ឆ្នាំ រស់នៅភូមិជ្រាវ សង្កាត់ជ្រាវក្រុងសៀមរាប ខេត្តសៀមរាប បានបើកបរមានទិសដៅពីកើតទៅលិច ហើយមានអ្នករួមដំណើរក្នុងរថយន្ត ប្រុសស្រីចំនួន៥នាក់ ប៉ះទង្គិច ទៅនឹងម៉ូតូមួយគ្រឿង ម៉ាកវេវសេ១១០ ពណ៌ក្រហមពាក់ផ្លាកលេខសៀមរាប 1D 42 91 បើកបរដោយឈ្មោះ ស៊ឹម ពេជ្រ ភេទប្រុស អាយុ៣១ឆ្នាំ (របួសស្រាល) ដែលបើកបរដឹកប្រពន្ធនិងកូន ស្រី ចំនួន២នាក់ទៀត ក្នុងនោះមានះ ១ -ប្រពន្ធឈ្មោះ តាយ តាន់ អាយុ ៣៦ឆ្នាំ(របួសស្រាល)។ ២ – កូន ឈ្មោះ ពេជ្រ មូនិកា ភេទស្រីអាយុ៦ខែ (ស្លាប់)។ ៣ -ឈ្មោះ ពេជ្រ មូលីកុដ្ឋ ភេទស្រី អាយុ ៦ឆ្នាំ (របួសធ្ងន់) ជនរងគ្រោះ មួយគ្រួសារនេះ រស់នៅភូមិបង្កោង ឃុំអំពិល ស្រុកប្រាសាទបាគង ខេត្តសៀម រាប ។ បើកបរ ក្នុងទិសដៅពីកើតទៅលិចបំរ៉ុងឆ្លងផ្លវទៅជើង ។
មូលហេតុម៉ូតូឆ្លងផ្លូវខ្វះការប្រុងប្រយ័ត្ន ។ ក្រោយពេលកើតហេតុកម្លាំងជំនាញបានចុះដល់កន្លែងកើតហេតុ ដើម្បីធ្វើការវាស់វែង រួចធ្វើការឃាត់ខ្លួន អ្នកបើកបរ និងរថយន្ត ប៉ុន្តែអ្នកបើកបររថយន្តមានរបួសធ្ងន់ផងនោះទើបកម្លាំងជំនាញបានដឹកយកមកព្យាបាល និងការពារនៅ គ្លីនិកឯកជនមួយនៅ ពីខាងកើតភោជនីយដ្ឋាន អាប៉ូឡូប្លាផ្សារ ។
បច្ចុប្បន្ន សពកូនជនរងគ្រោះត្រូវបានកម្លាំងនគរនៃអធិការដ្ឋានស្រុកប្រាសាទបាគង ប្រគល់ឱ្យក្រុមគ្រួសារយកទៅធ្វើបុណ្យនៅផ្ទះ ។ ចំណែក កូនស្រី ច្បង និងឪពុកម្តាយ ដែលរងរបួសធ្ងន់ស្រាល ព្រមទាំងតៃកុងរថយន្តកំពុងសម្រាកព្យាបាលនៅមន្ទីរពេទ្យឯកជន ដោយមានការការពារពីកម្លាំងសមត្ថកិច្ចផងដែរ ។ រីឯរថយន្ត និងម៉ូតូយកមករក្សាទុក នៅអធិការដ្ឋាននគរបាលស្រុក ដើម្បីរៀបចំកសាងសំណុំរឿងបញ្ជូនទៅកាន់ការិយាល័យនគរបាលចរាចរណ៍ខេត្ត ចាត់ការបន្តតាមនីតិវិធីច្បាប់៕
ផ្តល់សិទ្ធដោយ៖កោះសន្តិភាព
