Sign In 
ប្រទេសអ៊ីតាលី ៖ លោក Ivan Juric គ្រូបង្វឹកក្រុម Hellas Verona នៃក្របខណ្ឌ Serie A ត្រូវបានហាមឃាត់មិនឱ្យដឹកនាំក្រុមមួយប្រកួត និងពិន័យជាប្រាក់ចំនួន ១៥,០០០ អឺរ៉ូ (១៧,០០០ដុល្លារ) ពីបទជេរប្រមាថអាជ្ញាកណ្តាល និងអាជ្ញាកណ្តាលខ្សែបន្ទាត់ អំឡុងពេលក្រុមលោកចាញ់ក្រុមម្ចាស់ផ្ទះ AS Roma ដោយលទ្ធផល ២-១ កាលពីថ្ងៃពុធកន្លងទៅ។
គ្រូបង្វឹកវ័យ៤៤ឆ្នាំរូបនេះ បានផ្ទុះការខឹងសម្បារយ៉ាងខ្លាំង និងឈានដល់ការជេរប្រមាថ នៅពេលដែលអាជ្ញាកណ្តាលបានសម្រេចផ្តល់បាល់ប៉េណាល់ទីឱ្យ Roma ដែលសម្រេចបានដោយកីឡាករ Jordan Veretout នៅនាទីទី១០។
តុលាការវិន័យរបស់ក្របខណ្ឌកំពូលអ៊ីតាលី បានចេញសេចក្តីថ្លែងការណ៍មួយថា គ្រូបង្វឹកលោក Ivan Juric បានយល់ព្រមទទួលយកការហាមឃាត់ និងពិន័យជាប្រាក់នេះ ចំពោះការប្រើប្រាស់ពាក្យសម្តីជេរប្រមាថរបស់ខ្លួន ទៅលើមន្ត្រីអាជ្ញាកណ្តាល។
សូមបញ្ជាក់ថា គិតត្រឹមសប្តាហ៍ទី៣៣ ក្រុម Hellas Verona កំពុងឈរនៅចំណាត់ថ្នាក់លេខ៩ មាន ៤៤ពិន្ទុ ខណៈពួកគនឹងត្រូវបន្តជួបក្រុមលេខ៣ Atalanta នៅថ្ងៃសៅរ៍ចុងសប្តាហ៍៕ ផ្តល់សិទ្ធិដោយ៖ កោះសន្តិភាព
