Sign In 
រាជធានីភ្នំពេញ៖ មាតាបិតា អាណាព្យាបាលសិស្ស កំពុងស្ទាក់ស្ទើរក្នុងការចុះឈ្មោះឲ្យកូនចូលរៀននៅតាមសាលាឯកជន ព្រោះតែ សាលាឯកជនមួយចំនួន បានប្រកាសទទួលចុះឈ្មោះសិស្សចូលរៀនឆ្នាំសិក្សា២០២០ -២០២១ ប៉ុន្តែសាលាទាំងនោះមិនប្រាកដថា ការសិក្សាត្រូវរៀនដោយផ្ទាល់ ឬការសិក្សាតាមអនឡាញឡើយ ។ 
អ្នកស្រី សោភា ដែលមានកូនពីរនាក់រៀន នៅសាលាឯកជនមួយ ដែលមានស្តង់ដារធម្យម បាននិយាយថា គាត់ត្រូវបង់ថ្លៃសិក្សាឲ្យកូនពីរនាក់របស់គាត់ចំនួន៤ពាន់ដុល្លារក្នុង១ឆ្នាំ ។ ប៉ុន្តែឆ្នាំសិក្សាថ្មីនេះ គាត់មិនទាន់សម្រេចចិត្តថា ត្រូវបង់ថ្លៃសិក្សា ឬអត់នោះទេ ខណៈដែលការប្រកាសរបស់សាលារៀនកូនអ្នកស្រី ឲ្យបង់ថ្លៃសិក្សាបានធ្វើឡើងជាង១ខែហើយ ។
ម្តាយរបស់សិស្សរូបនេះបញ្ជាក់ថា អ្នកស្រីបារម្ភខ្លាចកូនរបស់គាត់ ត្រូវរៀនតាមអនឡាញទៀត ។ រៀនតាមអនឡាញ កូនៗរបស់អ្នកស្រីថា រៀនមិនចេះ ហើយបើគិតពីថ្លៃសិក្សានោះ គឺវាថ្លៃណាស់ ។ «ឆ្នាំកន្លងទៅខ្ញុំបង់ថ្លៃពេញមួយឆ្នាំឲ្យកូន តែការរៀនបានតែមួយឆមាស កូវីដចូលមកដល់ ។ ការសិក្សាតាមអនឡាញកូនៗថា ពួកគេរៀនមិនចេះ ។ ចំណែកសាលាមិនបានបញ្ចុះថ្លៃសិក្សាឲ្យមកវិញនោះឡើយ» ។
អ្នកស្រីសោភា និយាយថា មាតាបិតាសិស្សជាច្រើនចង់បានភាពប្រាកដប្រជាពីសាលារៀនថា ការសិក្សាឆ្នាំក្រោយនេះ រៀនតាមអនឡាញ ឬរៀនផ្ទាល់ ហើយបើរៀនតាមអនឡាញគួរណាបញ្ចុះតម្លៃសិក្សាខ្លះទើបសម ។
ក្រសួងអបរំបានប្រកាសថា គ្រោងបើកសាលារៀនឡើងវិញនៅខែសីហាខាងមុខ តែការបើកនោះ មានតែសាលាមួយចំនួនតូច ដែលមានស្តង់ដាបរិស្ថានសិក្សាកម្រិតខ្ពស់ប៉ុណ្ណោះ ។
ទោះជាប្រកាសទទួលចុះឈ្មោះចូលរៀនឆ្នាំសិក្សាថ្មី តែបុគ្គលិកសាលារៀនឯកជនជាច្រើន ក៏មិនហ៊ានអះអាងថាសាលារៀនគាត់នឹងបង្រៀនតាមអនឡាញ ឬសិក្សាផ្ទាល់នោះទេ ពីព្រោះអ្វីៗស្ថិតនៅក្នុងការសម្រេចរបស់ក្រសួង។
ទាក់ទិនក្នុងការបើកសាលារៀននេះដែរ កាលពីម្សិលមិញនេះ ថ្លែងពីខេត្តព្រៃវែង សម្តេចនាយករដ្ឋមន្ត្រីហ៊ុនសែន ប្រកាសថា សាលាថ្នាក់ឧត្តមសិក្សាអាចនឹងចូលរៀនមុនគេ ព្រោះកម្រិតសិក្សានេះ ងាយស្រួលក្នុងការគ្រប់គ្រង់ដោយសារតែនិស្សិតភាគច្រើនមានការយល់ដឹងខ្ពស់៕
