Sign In 
ខេត្តបន្ទាយមានជ័យ៖ ភាគីថៃបានសម្រេចបើកច្រកទ្វារព្រំដែនរបស់ខ្លួនឱ្យអាជីវករខ្មែរចូលទៅដឹកទំនិញរបស់ពួកគេនៅផ្សាររុងក្លឿចូលកម្ពុជាវិញ ដោយបានកំណត់១ថ្ងៃរថយន្ត៥០គ្រឿង និងមនុស្ស១០០នាក់ ត្រូវបានអនុញ្ញាតឱ្យចូលនៅថ្ងៃទី១៥ កក្កដា តាមច្រកទ្វារអន្តរជាតិប៉ោយប៉ែត ឆ្ពោះទៅច្រកខ្លងលឹកប្រទេសថៃ ។
យោងតាមសេចក្តីជូនដំណឹងរដ្ឋបាលក្រុងប៉ោយប៉ែតចុះថ្ងៃទី១០ ខែកក្កដា ឆ្នាំ២០២០ ស្តីពីការអនុញ្ញាតឱ្យអាជីវករខ្មែរ ដែលលក់ដូរនៅផ្សាររុងក្លឿស្រុកអារញ្ញប្រាថេត ខេត្តស្រះកែវប្រទេសថៃ ចូលទៅពិនិត្យទំនិញរបស់ពួកគេចាប់ពីថ្ងៃទី១៥ ខែកក្កដា ឆ្នាំ២០២០តទៅតាមពេលវេលា និងមានលក្ខខណ្ឌមួយចំនួនត្រូវបានកំណត់ ។
ទី១-អនុញ្ញាតឱ្យរថយន្តចេញ-ចូលចំនួន៥០គ្រឿង ក្នុង១ថ្ងៃ និងឱ្យចូលចំនួន២នាក់ ក្នុងមួយរថយន្ត ក្នុងនោះមានអ្នកបើកបរម្នាក់ និងអ្នករួមដំណើរម្នាក់ ។ អ្នកបើកបររថយន្តនិងអ្នករួមដំណើរសូមអនុវត្តតាមច្បាប់ឆ្លងដែន ត្រូវបង្ហាញឯកសារចេញ-ចូលប្រទេស ។ អ្នកដែលចូលទៅពិនិត្យទំនិញ ត្រូវពាក់ឧបករណ៍ការពារ តាមការណែនាំរបស់ក្រសួងសុខាភិបាល ដូចជាពាក់ម៉ាស់ និងវាស់កម្តៅ ដោយមិនឱ្យកម្តៅលើសពី៣៧,៣អង្សារ ។ ក្រៅពីនេះនៅមានបែបបទក្នុងការស្នើសុំអនុញ្ញាតឆ្លងកាត់ ឱ្យចូលចាប់ពីម៉ោង៨ដល់ម៉ោង១០ព្រឹក និងត្រឡប់មកវិញនៅម៉ោង១រសៀលជាកំហិត ។ ការបំពេញ បែបបទចូល ត្រូវមកបំពេញមួយថ្ងៃមុនថ្ងៃចូលនៅពេលព្រឹក ។
ទី២-ការកំណត់ទីតាំង និងផ្លូវធ្វើដំណើរ -ថ្ងៃអាទិត្យ ទីតាំងអនុញ្ញាតឱ្យចូលផ្សារអិនឌូចិន ។
-ថ្ងៃច័ន្ទ ទីតាំងអនុញ្ញាតឱ្យចូលផ្សារហ្វូលដិនក្រែន ។
-ថ្ងៃអង្គារ ទីតាំងអនុញ្ញាតឱ្យចូលផ្សារ (អ.ប.ច) ។
-ថ្ងៃពុធ ទីតាំងអនុញ្ញាតឱ្យចូលផ្សារផេនចាក់វ៉ាន់ ។
-ថ្ងៃព្រហស្បតិ៍ ទីតាំងអនុញ្ញាតឱ្យចូលផ្សាររ៉ាត់តាក់ណាក់ថាំ ។
-ថ្ងៃសុក្រ ទីតាំងអនុញ្ញាតឱ្យចូល ផ្សារ ដេតថៃ ។
ទី៣-សកម្មភាព និងណែនាំដែលគួរអនុវត្ត
អនុញ្ញាតឱ្យពិនិត្យនិងដឹកជញ្ចូនទំនិញនៅក្នុងផ្សាររុងក្លឿតាមទីតាំងដែលបានកំណត់ ដោយមិនអនុញ្ញាតឱ្យធ្វើដំណើរក្រៅពីបរិវេណដែលបានកំណត់នោះឡើយ ។ មិនអនុញ្ញាតឱ្យបុគ្គលដែលមិនមានការពាក់ព័ន្ធចូលក្នុងបរិវេណដែលអនុញ្ញាត ។ ម្ចាស់តូបទំនិញមុននិងធ្វើដំណើរវិលត្រឡប់មកវិញ សូមពិនិត្យទំនិញ តូប និងបិទប្រព័ន្ធភ្លើងឱ្យបានត្រឹមត្រូវ ចៀសវាងមានករណីអគ្គិភ័យកើតឡើងជយថាហេតុ ។
ខេត្តបន្ទាយមានជ័យបានលើកឡើងកិច្ចប្រជុំមន្ត្រីស្ថាប័នពាក់បានបញ្ជាក់ថា កម្ពុជា-ថៃ ខេត្តជាប់ជាយដែនបានសម្រេចបើកច្រកទ្វារព្រំដែនឱ្យអាជីវករចូលទៅពិនិត្យនិងដឹកទំនិញ ក្នុង១ថ្ងៃរថយន្ត៥០គ្រឿង អ្នកបើកបរនិងអ្នករួមដំណើរចំនួន១០០នាក់ ។
បើសិនជាប្រជាពលរដ្ឋកម្ពុជាជាអាជីវករកម្ពុជា គោរពតាមការណែនាំអាចភាគីមានការបន្ធូរបន្ថយ អាចឱ្យរថយន្ត និងអាជីវករខ្មែរចូលច្រើនលើសពីការកំណត់ នៅពេលខាងមុខបន្តទៀត ។ ហើយសុំឱ្យកម្លាំងនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត និងមន្ត្រីស្នាក់ការគយនិងរដ្ឋាករច្រកទ្វារអន្តរជាតិប៉ោយប៉ែត រួមជាមួយអាជ្ញាធរក្រុងប៉ោយប៉ែតត្រូវសហការគ្នាអនុវត្តឱ្យមានប្រសិទ្ធភាព ៕ ត្នោត 
