Sign In 
អាជ្ញាធររាជធានី បានព្រមានបិទក្លឹបកម្សាន្ត និងខារ៉ាអូខេ ប្រសិនបើអាជីវកម្មទាំងនោះ មិនគោរពតាមការណែនាំរបស់ប្រមុខរាជរដ្ឋាភិបាល។
លោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ បានឱ្យដឹងថា ស្របតាមការណែនាំរបស់ប្រមុខរាជរដ្ឋាភិបាល លើការអនុញ្ញាតឱ្យបើកក្លឹបកម្សាន្ត និងខារ៉ាអូខេឡើងវិញ គណៈអភិបាលរាជធានីភ្នំពេញ បានចេញសេចក្តីប្រកាសទាក់ទងនឹងលក្ខខណ្ឌ ក្នុងការបើកអាជីវកម្មក្លឹបកម្សាន្តនិងខារ៉ាអូខេ។
កាលពីព្រឹកថ្ងៃ១៤ កក្តដានេះ ប្រមុខរាជរដ្ឋាភិបាល បានប្រកាសតម្រូវឱ្យប្រែក្លាយ ទីតាំងខារ៉ាអូខេឱ្យទៅជាភោជនីយដ្ឋាន ហើយរដ្ឋបាលរាជធានីភ្នំពេញ ក៏បានធ្វើសេចក្តីជូនដំណឹង ដើម្បីបញ្ជាក់ច្បាស់ពីបញ្ហានេះផងដែរ។
លោក ម៉ម វាសនា បានស្នើឱ្យម្ចាស់អាជីវកម្មទាំងអស់ ដែលមានជាង៩០ទីតាំង និងឌីស្កូតែក ជាង២០ទីតាំង ត្រូវផ្លាស់ប្តូរប្រែទៅជាភោជនីយដ្ឋាន នឹងត្រូវដាក់ពាក្យស្នើសុំនៅច្រកចេញចូលតែមួយ របស់រដ្ឋបាលរាជធានីភ្នំពេញ។ “រហូតមកដល់ពេលនេះ ម្ចាស់អាជីវកម្មទាំងនោះ បានដាក់ពាក្យស្នើរសុំប្រែក្លាយជាភោជនីយដ្ឋានបណ្តើរៗហើយ ប៉ុន្តែបើពួកគាត់នៅតែបន្តបើកទៀតមានន័យថា ពួកគាត់បានល្មើសទៅនឹងគោលការណ៏របស់រាជរដ្ឋាភិបាល និងរដ្ឋបាលរាជធានីភ្នំពេញតែម្តង”។
លោកម៉ម វាសនាថា សម្រាប់ស្ថិតិអាជីវកម្ម សេវាកម្សាន្តទេសចរណ៍ មនុស្សពេញវ័យ ដែលបានចុះបញ្ជីត្រឹមត្រូវ (ខារ៉ាអូខេ រង្គសាល-ឌីស្កូតែក បៀហ្គាឌិន ) នៅ ក្នុងរាជធានីភ្នំពេញ មានចំនួន១៣៨ទីតាំង បុគ្គលិកសរុប៤៥៨៨នាក់។
ដោយឡែក សេវាកម្មខារ៉ាអូខេមានចំនួន៩៦ទីតាំង បុគ្គលិកសរុប៣១៣៨នាក់។ ប្រភេទសេវាកម្ម រង្គសាល-ឌីស្កូតែក មានចំនួន២៨ទីតាំង មានបុគ្គលិកសរុប១១៥៨នាក់។ ប្រភេទសេវាកម្ម បៀហ្គាឌិន មាន ចំនួន ១១ ទីតាំង មានបុគ្គលិក សរុប២៩២នាក់ ។ ចំណែក អាជីវកម្ម សេវាកម្ម ស្ប៉ា និងម៉ាស្សានៅរាជធានីភ្នំពេញ មានចំនួន១២៣ទីតាំង (៩៣១គ្រែ ) បុគ្គលិក២៣០៧នាក់៕ ដោយ៖ត្នោត
