Sign In 
អាជ្ញាធរខេត្តកំពត បានដាក់ចេញនូវផែនការ ទាក់ទាញកំណើនភ្ញៀវទេសចរ ឱ្យបានប្រមាណ ២,៥លាននាក់ ក្នុងនោះភ្ញៀវទេសចរអន្តរជាតិឱ្យបានចំនួន៣សែននាក់ នៅឆ្នាំ២០២៣ខាងមុខនេះ។
ជាមួយគ្នាផងដែរ ដើម្បីសម្រេចបាននូវកំណើនភ្ញៀវទេសចរជាតិ និងអន្តរជាតិ ដូចបានកំណត់ខាងលើនេះ លោក ជាវ តាយ អភិបាលខេត្តកំពត បានធ្វើការកោះប្រជុំអ្នកពាក់ព័ន្ធ ដើម្បីជជែកពីបញ្ហាខាងលើនេះ។
តាមរយៈកិច្ចប្រជុំមួយ ដែលបានធ្វើឡើង កាលពីព្រឹកថ្ងៃទី៩ ខែកញ្ញា ឆ្នាំ២០២០ នៅខេត្តកំពត គឺបានលើកឡើងនូវការផ្សព្វផ្សាយ ពីផែនការអភិវឌ្ឍន៍តំបន់ទេសចរណ៍ នៅក្នុងខេត្តកំពតជាច្រើនកន្លែង។
គណៈអភិបាលខេត្តកំពត បានដាក់ចេញនូវយុទ្ធសាស្ត្រចំនួន១២ចំណុច ដើម្បីឲ្យគ្រប់ភាគីពាក់ព័ន្ធ បានយកចិត្តទុកដាក់ ក្នុងការចូលរួមអនុវត្ត នូវភារកិច្ចរបស់ខ្លួន ដើម្បីឱ្យផែនការអភិវឌ្ឍន៍ខេត្តនេះ បានឈានទៅភាពជោគជ័យ។
បើតាមលោក ជាវ តាយ អភិបាលនៃគណ:អភិបាលខេត្តកំពត បានឱ្យដឹងថា កម្ពុជាមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍ ត្រូវបានរាជរដ្ឋាភិបាល ចាត់ទុកជាប៉ូលសេដ្ឋកិច្ចមួយដ៏សំខាន់ រួមចំណែកយ៉ាងសកម្ម ក្នុងការអភិវឌ្ឍសេដ្ឋកិច្ចសង្គម បង្កើតឱកាសមុខរបរ បង្កើនប្រាក់ចំណូលលើកកម្ពស់ជីវភាពរស់នៅរបស់ប្រជាពលរដ្ឋ។
លោកអភិបាលមានប្រសាសន៍ថា ផែនការអភិវឌ្ឍន៍ទេសចរណ៍រយៈពេល៥ឆ្នាំ (២០១៩-២០២៣)នេះ បានបង្ហាញនូវចក្ខុវិស័យច្បាស់លាស់ សម្រាប់អនាគត នៃការអភិវឌ្ឍវិស័យទេសចរណ៍ខេត្តកំពត ដោយផ្តោតជាសំខាន់ ទៅលើទិសដៅយុទ្ធសាស្ត្ររួមមាន ការអភិវឌ្ឍផលិតផលទេសចរណ៍ ការសិក្សាទីផ្សារ ការផ្សព្វផ្សាយ ការតភ្ជាប់ និងការសម្រួលការធ្វើដំណើរ ការអភិវឌ្ឍហេដ្ឋារចនាសម្ព័ន្ធ ការអភិវឌ្ឍសម្បទាទ្រទ្រង់ទេសចរណ៍ ការអភិរក្សធនធានវប្បធម៌ និងធម្មជាតិ ការអភិវឌ្ឍធនធានមនុស្ស ការគ្រប់គ្រងផលប៉ះពាល់ជាអវិជ្ជមាននៃវិស័យទេសចរណ៍។
ផែនការអភិវឌ្ឍនេះ ក៏ចង្អុលបង្ហាញពីការសិក្សាបញ្ហាប្រឈមហានិភ័យ ចំណុចខ្លាំង កាលានុវត្តន៍ភាព និងការដាក់ចេញនូវយុទ្ធសាស្ត្រ វិធានការ ផែនការសកម្មភាព យន្តការដើម្បីអនុវត្ត និងការត្រួតពិនិត្យវាយតម្លៃ។
សូមបញ្ជាក់ថា កន្លងមកនេះ ខេត្តកំពតទទួលបានទទួលភ្ញៀវទេសចរសរុបជាង ១លាន ៦សែននាក់ កាលពីឆ្នាំ២០១៩ ដែលក្នុងនោះភ្ញៀវទេសចរអន្តរជាតិមានជាង១៧ម៉ឺននាក់។
ភ្ញៀវទេសចរក្នុងស្រុកម្នាក់ បានចំណាយជាមធ្យម៥០ដុល្លារ ក្នុងដំណើរកម្សាន្តមួយលើក ស្របពេលភ្ញៀវទេសចរបរទេសចំណាយជាមធ្យម ១០០ដុល្លារ ដែលបានធ្វើឱ្យចំណូលពីវិស័យទេសចរនៅខេត្តកំពត កាលពីឆ្នាំមុនមានប្រហែល ១០០លានដុល្លារ៕ ដោយ៖ ឃួន លក្ខិណា
