Sign In 
កាលក្នុងសាសនាព្រះសម្មាសម្ពុទ្ធព្រះនាមកស្សប មានព្រាហ្មណ៍កំណាចម្នាក់បាននិមន្តព្រះសង្ឃជាច្រើនអង្គមកឆាន់ ពេលព្រះសង្ឃមកដល់ផ្ទះហើយព្រាហ្មណ៍នោះបានចាក់លាមកពេញស្នូករួចលើកយកមកប្រគេនលោកហើយក៏ពោលថា ចូរលោកម្ចាស់ទាំងឡាយនិមន្តឆាន់ឱ្យឆ្អែកចុះ ដោយសារតែអំពើបាបកម្មដ៏អាក្រក់នោះឯងលុះអស់អាយុសង្ខារ ព្រាហ្មណ៍នោះទៅកើតជាប្រេតលិចក្នុងរណ្តៅលាមករដ៏អសោចិ៍ ។
ប្រេតកំណាចនោះឈ្មោះទុតិយខាទិប្រេត គឺប្រេតស៊ីលាមក ប្រេតនេះលេចចុះក្នុងរណ្តៅលាមកដល់បាតរណ្តៅហើយហើបមកវិញក៏ចាប់លាមកដោយដៃទាំងពីរ ស៊ីជាអាហារសែនមហាទារុណ ។
ព្រះភគវាត្រាស់ថា ម្នាលភិក្ខុទាំងឡាយប្រេតនុះ កាលពីដើមជាព្រាហ្មណ៍កំណាចក្នុងក្រុងរាជគ្រឹះនេះឯង ដោយកម្មវិបាកចាក់លាមកឱ្យលោកឆាន់នោះ ព្រាហ្មណ៍កំណាចនោះក៏ឆេះនៅក្នុងនរកអស់រាប់សែនឆ្នាំ រួចពីនរកក៏បានមកសោយផលកម្មជាប្រេតក្នុងរណ្តៅលាមករងទុក្ខវេទនារហូតដល់ថ្ងៃនេះ ។
