Sign In 
ខេត្តព្រៃវែង៖ បានប្រកាសចេញពីខេត្តព្រៃវែង នៅព្រឹកថ្ងៃទី១៤ កក្កដានេះប្រមុខរដ្ឋាភិបាលកម្ពុជា បានប្រតិកម្មចំពោះហាង KTV ដែលបើកដំណើរការឡើងវិញតែមិនបានបើកជាភោជនីយដ្ឋាន ដោយគ្រាន់តែជ្រកក្រោមស្លាក ភោជនីយដ្ឋាន។
ក្នុងឱកាសអញ្ជើញចុះទៅពិនិត្យមើលជ្ឈមណ្ឌលស្រាវជ្រាវ និងអភិវឌ្ឍន៍ពូជត្រី និងជួបសំណេះសំណាលជាមួយបងប្អូនប្រជាកសិករ នៅស្រុកពាមរក៍ ខេត្តព្រៃវែង នៅព្រឹកថ្ងៃអង្គារ៍ ទី១៤ ខែកក្កដានេះ សម្តេច ហ៊ុន សែន បញ្ជាក់ថា សម្រាប់ទីតាំងខារ៉ាអូខេមួយកន្លែងដែលលួចជ្រកក្រោមស្លាកភោជនីយដ្ឋាន ត្រូវបានបង្ក្រាបនៅខណ្ឌចំការមន កាលពីយប់ថ្ងៃទី ១៣ កក្កដា គឺដូរផ្លាកតែខាងមុខ តែខាងក្នុងជាខារ៉ាអូខេដដែល។
សូមរម្លឹកថា ក្រោយកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី ៣ ខែកក្កដា សម្តេចតេជោ ហ៊ុន សែន បានសម្រេចអនុញ្ញាតិអោយបើកដំណើរការ KTV ឡើងវិញ ។ ក៏ប៉ុន្តែការអនុញ្ញាតឲ្យអាជីវកម្មកម្សាន្ត និង KTV នៅរាជធានីភ្នំពេញ និងតាមបណ្ដាខេត្ត គឺតម្រូវឲ្យទីតាំងទាំងនោះត្រូវប្រែក្លាយទៅជាភោជនីយដ្ឋាន ដើម្បីចូលរួមសកម្មភាពសេដ្ឋកិច្ច និងផ្ដល់ការងារឡើងវិញ ប៉ុន្ដែត្រូវគោរពឲ្យបានម៉ឺងម៉ាត់នូវវិធាននៃក្រសួងសុខាភិបាល ក្នុងការទប់ស្កាត់នូវការរីករាលដាល នៃជំងឺឆ្លងកូវីដ១៩ នៅកម្ពុជា ៕ ត្នោត
