Sign In 
យើងដឹងហើយអាណាចក្រខ្មែរពីសម័យដើមលាតសន្ធឹងធំធេងណាស់នៅជ្រោយឥណ្ឌូចិនរហូតមានទឹកដីលាតសន្ធឹងលើប្រទេសឡាវ, ថៃ និងមួយផ្នែកនៃប្រទេសវៀតណាមភាគខាងត្បូងនាពេលបច្ចុប្បន្ន។
ប្រភពពីសិលាចារឹកបានរៀបរាប់ថាខ្មែរមានព្រំប្រទល់ដែនគោកជាប់ប្រទេសម៉ាឡេស៊ី, ភូមានិងរហូតដល់ប្រទេសចិននាសម័យនោះ។ ភស្តុតាងដាច់ដោយឡែកផ្សេងទៀតគឺមានសេសសល់បុរាណដ្ឋាន ប្រាសាទ និងវត្តអារាមបុរាណជាច្រើនដែលតាំងទីនៅក្នុងប្រទេសថៃ, ឡាវ និងវៀតណាម សុទ្ធសឹងជាសក្ខីកម្មបង្ហាញពីឥទ្ធិពលអាណាចក្រខ្មែរនាសម័យអង្គរ។
ដោយឡែកនៅប្រទេសជប៉ុនឯណោះវិញក៏មានដែរនូវប្រាសាទបុរាណជារចនាបថខ្មែរយ៉ាងល្អឯក ឈរយ៉ាងរឹងមាំនៅលើកំពូលភ្នំធម្មតាហាលវាលហាលខ្យល់ដែលមនុស្សភាគច្រើនមិនសូវបានដឹង និងស្គាល់។ ប្រាសាទនោះគឺជាវត្តក្នុងប្រទេសជប៉ុនដែលសាងសង់ឡើងតាមរចនាបថខ្មែរយកគំរូតាមប្រាសាទអង្គរវត្តដ៏ល្បីល្បាញ។
ប្រាសាទអង្គរវត្តចម្លងមានទីតាំងស្ថិតនៅក្នុងខេត្តតូចបំផុតមួយរបស់ជប៉ុនឈ្មោះ Kagawa ស្ថិតនៅលើកោះ Shikoku ដែលមានទីក្រុងឈ្មោះ Takamatsu។ អង្គរវត្តខ្មែរសង់ក្នុងសតវត្សទី១២ តែប្រាសាទចម្លងនៅជប៉ុននេះសង់ឡើងក្នុងសតវត្សទី២០ អំឡុងឆ្នាំ១៩៩១ ហើយមានកំពូលតែមួយប៉ុណ្ណោះចំកណ្ដាលអមដោយកំពែងព័ទ្ធជុំវិញពោលគឺមិនចម្លងតាមមហាប្រាសាទអង្គរទាំងស្រុងនោះទេ៕ អត្ថបទ៖ WowCambodian
