Sign In 
អង់គ្លេស ៖ ក្លិប Everton ក្រោមការដឹកនាំរបស់លោក Carlo Ancelotti បានសម្រេចការចុះហត្ថលេខាលើខ្សែបម្រើប្រយុទ្ធកូឡុំប៊ី James Rodriguez ពីក្លិបយក្ស Real Madrid នៅក្នុងតម្លៃ ២០លានផោន ជាមួយកិច្ចសន្យារយៈពេល ២ឆ្នាំ រួមនិងជម្រើសបន្ថែម ១ រដូវកាលទៀត។
James ដែលនឹងពាក់អាវលេខ ១៩ សម្រាប់ក្រុមថ្មីរបស់ខ្លួន បានថ្លែងប្រាប់គេហទំព័រផ្លូវការរបស់ Everton ថា«ខ្ញុំពិតជារីករាយខ្លាំងណាស់ ដែលបានមកចូលរួមជាមួយក្លិបដ៏អស្ចារ្យនេះ ដែលជាក្លិបមួយមានប្រវតិ្តសាស្ត្រជាច្រើន។ ហើយនៅទីនេះ ខ្ញុំនឹងលេងក្រោមការដឹកនាំរបស់អ្នកចាត់ការទូទៅ ដែលស្គាល់ខ្ញុំច្បាស់បំផុត»។
ខ្សែបម្រើប្រយុទ្ធក្រុមជម្រើសជាតិកូឡុំប៊ីវ័យ ២៩ឆ្នាំរូបនេះ បានបន្ថែមទៀតថា «ខ្ញុំទន្ទឹងរង់ចាំទទួលបាននូវអ្វីដែលថ្មី និងអស្ចារ្យនៅទីនេះ។ ជាមួយការឈ្នះដែលជាគោលបំណងរបស់មនុស្សគ្រប់គ្នា។ ហើយខ្ញុំមកទីនេះ គឺដើម្បីព្យាយាមធ្វើឱ្យអ្វីៗប្រសើរឡើង។ ហើយខ្ញុំក៏បានមកទីនេះ ដើម្បីជួយក្រុមឲ្យឈ្នះ ជាមួយនិងទម្រង់លេងឲ្យបានល្អ»។
ជម្រាបជូនថា James គឺជាផ្នែកមួយដ៏សំខាន់សម្រាប់លោក Ancelotti ដើម្បីកសាងមហិច្ឆតារបស់ក្រុម Everton ដោយលោកជឿជាក់ថា វត្តមានរបស់គេ នឹងជួបក្រុមរបស់លោកឲ្យកាន់តែមានភាពល្អប្រសើរ និងការប្រកួតប្រជែងជាមួយក្រុមដទៃទៀត ក្នុងក្របខណ្ឌ Premier League រដូវកាលក្រោយ៕ ផ្តល់សិទ្ធដោយ៖កោះសន្តិភាព
