Sign In 
ខេត្តបាត់ដំបង ៖ ឃាតករដែលសម្លាប់ថៅកែអេតចាយ២នាក់ម្ដាយនិងកូនស្រី កាលពី០៨ឆ្នាំនៅក្នុងក្រុងបាត់ដំបង ត្រូវកម្លាំងការិយាយ័យព្រហ្មទណ្ឌកំរិតធ្ងន់ នៃស្នងការខេត្ត តាមស្រាវជ្រាវឃើញនិងចាប់ខ្លួនបានហើយ កាលពីព្រឹកថ្ងៃទី០៧ កញ្ញា នេះ គឺតាមចាប់ដល់ស្រុកវាលវែង ខេត្តពោធ៍សាត់ ដោយមានកិច្ចសហការយ៉ាងល្អជាមួយនឹងកម្លាំងអធិការនេះផង។ នេះបើតាមសេចក្ដីរាយការណ៏ពីការិយាល័យព្រហ្មទណ្ឌកំរិតធ្ងន់។
សេចក្ដីរាយការណ៏បានឱ្យដឹងថា ជនដៃដល់នោះឈ្មោះ ច្រាញ់ អឿម អាយុ៣៨ឆ្នាំ រស់នៅភូមិជ្រៃកោង សង្កាត់ស្លាកែត ក្រុងបាត់ដំបង តែជននេះបានរត់គេចទៅសម្ងំលាក់ខ្លួននៅស្រុកវាលវែង ក្រោយពីសម្លាប់ថៅកែអេតចាយកាលពី០៨ឆ្នាំមុន។ បើតាមមន្ត្រីការិយាល័យនេះ បានប្រាប់ថា ជននេះត្រូវបានចាប់ខ្លួនតាម ដីកាបង្គាប់ឱ្យចាប់ខ្លួន លេខ២៥៦ ចុះថ្ងៃទី០៧ មិថុនា ឆ្នាំ២០១៣ ដោយលោក គឹម រ៉ាវី ចៅក្រមស៊ើបសួរសាលាដំបូងខេត្តបាត់ដំបង។ ជនឈ្មោះ ច្រាញ់ អឿម នេះ ត្រូវបានអយ្យការអមសាលាដំបូងចោទប្រកាន់ពីបទ«ឃាតកម្ម» ដែលប្រព្រឹត្តទៅលើជនរងគ្រោះម្ដាយនិងកូនស្រី។
សូមរំលឹកថា កាលពីយប់ថ្ងៃទី៤ ខែធ្នូ ឆ្នាំ២០១២ អំពើឃាតកម្មមួយបានកើតឡើងយ៉ាងឃោឃៅបំផុត នៅក្នុងឃ្លាំងទិញអេតចាយដ៏ធំមួយកន្លែង នៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង ដែលបង្កឡើងដោយជនដៃដល់ឈ្មោះ ច្រាញ់ អឿម ដែលជននេះ ធ្លាប់ធ្វើជាកម្មករនៅទីនោះ។ ជនរងគ្រោះដែលស្លាប់យ៉ាងអាណោចអាធ័មក្រោមកណ្ដាប់ដៃឃាតករូបនេះ ជាថៅកែអេតចាយនេះតែម្ដង គឺម្ដាយឈ្មោះ ឈួយ មួយ អាយុ៤៥ឆ្នាំ និងកូនស្រីឈ្មោះ តាំង អៀងកៀង អាយុ១៣ឆ្នាំ។
នៅក្នុងហេតុការណ៏នោះ ជនដៃដល់បានចូលទៅសម្ងំក្នុងបន្ទប់ជនរងគ្រោះ ហើយបានចាប់រឹត.កកូនស្រីនៅក្នុងបន្ទប់ទឹករួចសម្លាប់ចោល។ ពេលសម្លាប់នាងរួច ជននេះមិនទាន់ចេញទេ ស្របពេលនោះម្ដាយនាងជិះម៉ូតូមកទារលុយគេ បើកទ្វារចូលផ្ទះ ក៏ត្រូវជនដៃដលកាប់នឹងពូថៅរហូតដល់ស្លាប់ទាំង២នាក់ម្ដាយកូនយ៉ាងរន្ធត់បំផុត។
ពាក់ព័ន្ធនឹងសំណុំរឿងឃាតកម្មនេះ បើតាមសមត្ថកិច្ចបាននិយាយថា ជនដៃដល់ឈ្មោះ ច្រាញ់ អឿម ធ្លាប់ធ្វើជាមន្ត្រីយោធា ហើយធ្លាប់ធ្វើជាកម្មករអេតចាយនៅជាមួយជនរងគ្រោះផងដែរ។ ប៉ុន្តែមុនពេលកើតហេតុប្រហែលមួយខែ ថៅកែអេតចាយបានបណ្ដេញជនដៃដល់រូបនេះចេញពីឃ្លាំងរបស់ខ្លួន ដោយសារតែមានជម្លោះរវាងជននេះ និង ថៅកែ។
ដោយសារតែជនដៃដល់ខឹងនឹងការបណ្ដេញចេញពីការងារនេះ ទើបធ្វើឱ្យជនដៃដល់ចងជាគំនុំ ហើយព្យាយាមលបធ្វើឃាតថៅកែអេតចាយ២នាក់ម្ដាយ-កូននេះ រហូតបានសម្រេច។សមត្ថកិច្ចក៏បានបញ្ជាក់ដែរថា ពេលដែលឃាតកចូលសម្លាប់ប្រពន្ធនិងកូននេះ គឺស្របពេលដែលស្វាមីគាត់កំពុងនៅមើលការងារនៅឯក្រុងប៉ោយប៉ែត ហើយមានតែកូនប្រុសម្នាក់ និងកម្មករប៉ុន្មាននាក់ប៉ុណ្ណោះ ដែលនៅផ្ទះកើតហេតុជាមួយជនរងគ្រោះ។
ក្រោយពីសម្លាប់ថៅកែរបស់ខ្លួនបានសម្រេច ជនត្រូវចោទឈ្មោះ ច្រាញ់ អឿម នេះ បានគេចខ្លួនជារៀងរហូត។ ប៉ុន្តែដោយសារតែការប្រឹងប្រែងតាមស៊ើបអង្កេតជាប្រចាំរបស់មន្ត្រីការិយាល័យជំនាញ ទើបមានតម្រុយអំពីទីកន្លែងលាក់ខ្លួនរបស់ឃាតករ និង ឈានដល់ការចាប់ខ្លួនតែម្ដង ។
បើតាមមន្ត្រីការិយាល័យព្រហ្មទណ្ឌកំរិតធ្ងន់ បានបញ្ជាក់ថា ពេលនេះ កម្លាំងផ្នែកអនុវត្តដីកា ដែលបានសហការជាមួយកម្លាំងអធិការស្រុកវាលវែង កំពុងបញ្ជូនខ្លួនឃាតកដៃឆៅនោះ មកកាន់ស្នងការខេត្តបាត់ដំបងហើយ មុនពេលបញ្ជូនបន្តទៅប្រគល់ជូនតុលាការខេត្ត៕ ផ្តល់សិទ្ធដោយ៖កោះសន្តិភាព
