Manchester City និង Juventus កំពុងនាំមុខគេក្នុងការប្រជែងយកខែ្សបម្រើប្រយុទ្ធមាឌធំ កំពូលល្បឿន Adama Traore របស់ក្លឹប Wolverhampton។

Traore បានក្លាយជាមុខសញ្ញាសំខាន់នាបណ្ដាក្លឹបធំៗរបស់អឺរ៉ុប ក្រោយពីបានបង្ហាញទម្រង់លេងយ៉ាងល្អនារដូវកាលនេះ ដោយជួយក្លឹប Wolves របស់ខ្លួនស្ថិតនៅចំណាត់ថ្នាក់ទី៦ ក្នុងតារាង Premier League។

គិតត្រឹមពេលនេះ អតីតយុវជនថ្នាលរបស់ Barcelona អាចស៊ុតចូលចំនួន៤គ្រាប់ និងបញ្ចូនបានចំនួន៩ដង ពោលគឺស្ថិតនៅក្រោម De Bruyne តែម្នាក់គត់ក្នុងនាមជាខែ្សបម្រើដែលអាចបញ្ចូន និងស៊ុតច្រើនក្នុងលីគ។

បើតាមសារព័ត៌មាន ESPN បានឲ្យដឹងថា ជាមួយនឹងកុងត្រានៅសល់៣ឆ្នាំជាមួយ Wolves កីឡាករសាច់ដុំនេះ អាចនឹងបន្ដនៅកីឡដ្ឋាន Molineux នៅរដូវកាលក្រោយ បើក្លឹបអាចកក់កៅអី Champions League ដោយឈ្នះជើងឯក Europa League។

ប៉ុន្ដែបើពួកគេមិនអាចធើ្វបានទេ Juventus និង Man City នឹងត្រៀមធើ្វការដេញថៃ្លយករូបគេ ខណៈក្លឹបទាំង២ កំពុងព្យាយាមធើ្វការពង្រឹងសមត្ថភាពកីឡាកររបស់ខ្លួនសម្រាប់ប្រជែងពានរដូវកាលក្រោយផងដែរ។

តើប្រិយមិត្ដគិតថា Traore នឹងបន្ដនៅ Wolves ឬក៏នឹងផ្លាស់ទៅ Man City ឬ Juventus រដូវកាលក្រោយ?

ប្រភព៖ ESPN

from： https://tnaot.com/km/m/detail/article/9463257